政情：內地三大油公司大執位

內地石油公司高層大執位！之前話中石化嘅董事長蘇樹林畀中央正式委任為福建省委副書記，至於邊個會坐佢個位就一直冇消息，但中海油發言人話中石化董事長一職，將會由依家中海油董事長傅成玉轉任，同時做埋中石化集團黨組書記，至於中石化總裁王天普亦會升呢做集團總經理。

蘇樹林咁樣郁一郁，三大石油公司即時大執位，消息話，傅成玉將會辭任中海油董事長一職，而另一大油企中石油董事兼中石油集團副總經理王宜林，就會接替傅成玉，擔任佢喺中海油嘅職務。

有內地老友就話，中石化尋日上晝已經召開會議，一位中組部副部長出席兼宣布咗對傅成玉同王天普嘅任命，但中海油內部嗰邊就仲未傳達呢次任命。

話時話，中海油同中石化兩個話事人都有新嘅去向，不過暫時就未有中石油董事長蔣潔敏份，但坊間已經有傳言，估佢好有可能好似蘇樹林咁，去做某個南方省份嘅地方官員。