政情：唐唐護副局矮化立法會

行政、立法會關係一直緊張，今屆更加變本加厲，持續惡化，除咗有官員經常性揶揄議員，有時建制派亦放棄保皇，搞到政府大失預算，政府官員同議員喺議事廳內經常出現對峙嘅局面，而立法會內務委員會尋日又上演一場矛頭指向政府嘅批鬥大戰。

話說有議員投訴，指立法會財經及交通事務委員會二月舉行聯合會議傾汽車保險問題，但所屬嘅運輸及房屋局局長鄭汝樺嚟唔到，起碼副局長邱誠武都應該坐喺度，但正副局長都冇到，淨係搵個技術官員嚟解畫，班議員非常不滿，早前仲透過內會主席Miriam劉健儀向政務司司長唐唐反映。

雞同鴨講逃避問題

點知唐唐竟然話因為有關事宜係涉及運作同技術問題，而非政策問題，所以認為派署級官員嘅安排係恰當。咁樣即係擺明護住鄭汝樺同邱誠武啫！

唐唐明顯係火上加油，工聯會潘佩璆表明，經常性傾技術問題都會牽涉政策範疇，質疑當局特登派唔對等嘅官員嚟等大家雞同鴨講，逃避問題；獨立泛民議員鄭家富更怒轟唐唐矮化立法會，同時質疑唐唐彈弓手，冇解釋清楚點界定政策問題，係對立法會嘅唔尊重。

人民力量嘅陳偉業就質疑政府大細超，話個別建制政黨嘅元老可以拉隊見局長，但立法會開會竟然連個副局長都冇，認為當局係侮辱立法會，聲言如果第日再有官員當立法會冇到，佢會離場唔開會抗議喎！

Miriam引述唐唐回應時都加把口鬧埋一份，話已經同佢拗咗一輪，但唐唐都係堅持己見，遲啲會再向唐唐反映議員意見。佢又指今次唔係第一次反映呢個問題，點知唐唐都係錄音機上身咁，叫各委員會主席日後主動邀請局方派代表出席，好過自己喺度激氣喎！