Fundman睇市：地產股可重新睇好

期指結算日，港股早段原本無乜睇頭，之後見A股愈升愈有，好友把握機會推高個結算價，恒指收市升123點，報24,902點，成交增加至827億元。滬港通130億的北向配額，玩到收市剩低133億，意味外資唔單止唔追勢，反而沽凸收場，同心雄的內地散戶，形成強烈反差。

玖龍紙業（02689）中期業績跌三成，賺6.79億元人民幣，只及大行21億元人民幣平均預測的三成二，股價即插11.1%，收報5.08元，逼近舊年五月做出的4.8元五十二周低位。

玖紙吸引力欠奉

撇除期內出售資產的兩千多萬人民幣一次性損失外，玖紙銷售有6.6%增加，但最致命是毛利率的壓縮，由15.8%跌至13.3%。內地出口製造業表現疲弱，包裝紙品需求轉弱，價格競爭加劇實屬必然，假設下半年業績與上半年持平，市盈率13.3倍左右，純以一隻業績未確認見底的工業股來看，吸引力普通。

中電（00002）全年業績，純利112.21億元，升85.1%，稍稍好過市場預期，每股盈利4.44元，第四期派息1元，連同首三季，合共每股派2.62元，以現價69.3元計，相當於3.78厘。

中電業績勁升，其實是一三年需為Energy Australia等投資，作出接近32億元的資產減值，今年無同類型數字影響所致。期內內地業務貢獻減少25.9%，至15.79億元，儘管大亞灣核電站在成本控制表現較佳，但燃煤項目收益減少近三成九至7.19億元。

中電業績勝預期

為了減低對香港業務的依賴，以及避免每幾年被重訂利潤管制協議所牽制，近年中電積極「走出去」，諷刺是香港生意反而有聲有色，售電量破紀錄，去年升3.6%至329.25億度、全年住宅客戶售電量按年顯著升9.1%、香港的營運盈利增長11.6%至77.7億元。

由於利潤管制協議一年年檢討唔會郁，中電業績睇住本地無乜驚喜的售電表現外，唔少估計來自澳洲的投資，一五、一六有較大改善，過去十年中電股息率介乎3.5至5.3厘，現在偏於低端是全球超低息環境造成。就公用股而論，似乎中電較適宜退休人士，比較進取的，長建（01038）仲係首選。

續談財政預算案，較意外是財爺話去年樓價升一成四屬可以接受，等冧市的無殼一族自然鬧爆，亦被魚缸解讀成短期無意針對細價樓狂潮加辣。今年政府推售廿九幅地，配合未來十年計劃，建屋48萬個單位，在下認為，依家係兩面都唔討好，樓價高唔出招，固然被市民責難，但一堆辣招同埋一手住宅物業銷售監管，本地發展商早就有怨言，假如真係加辣，隨時搞到佢哋停晒手唔買地減慢建屋進度，個十年建屋目標一樣泡湯收場。

較意想不到是預算案後，本地地產股股價唔多郁，計落現價平均較資產淨值折讓三成四，在樓市屢創新高下股價持續背馳，本來就唔多合理，加埋美國聯儲局主席耶倫早幾日於聽證會上，對加息態度曖昧，低息期可能比預期長，好似新地（00016）、恒地（00012）等龍頭地產股，應該可以睇番好些少。