Fundman睇市：中石油有力再升

過去幾日香港魚缸假期，市場焦點落在希臘同歐洲央行的談判上，一眾花生友，當然唔想見到以和為貴的結局。雖然希臘選民支持賴帳王左翼聯盟上場，不過民調顯示，七成五希臘國民都好實際，唔想離開歐元區，以免導致貨幣及經濟崩潰，換來惡性通脹。歐央行最終延長了援助計劃四個月，結果真係老土兼預期之內。不過，希臘莫財也是事實，脫歐的鬧劇，恐怕會同荷里活漫畫英雄電影一樣， 會無限開拍續集，兩、三個月之後，又再同歐央行吵吵鬧鬧過。

希臘大步檻過，刺激美股做好，道指上周五收18,144點，升154點創歷史新高。道指經過兩個多月喺上限18,103點同下限17,037點之間的橫行爭持，終見好友技勝一籌。難得十年美債息，個多月之間由1.65厘彈番去上周五的2.13厘，股市開始接受聯儲局嚟緊的議息聲明，可能刪除就加息方面「保持耐性」的字眼，為下一步加息，做好心理準備。

羊年往績有啟示

馬年最後一個交易日，港股得半日市，主板成交縮至連300億元都唔夠。不過，個市靜局反而益咗期指散仔，用少少銀両逐少逐少咁托起指數，最後達成五連升，恒指收報24,832點，升47點。總結馬年恒指累漲2,796點或12.7%，國指升22.8%。

雖然喺動物世界，馬一定跑得快過羊，但有趣的是，過去三次羊年，港股都係勁升，○三年羊年經歷後沙士年代，升48%，九一年羊年升36%，再耐少少，七九年羊年恒指升咗80%。雖然無科學根據話，呢類統計會歷史重演，但睇見之前幾個羊年升成咁，對今年港股，多少都會有所期望。

去年底中國政府終於接受現實，唔能夠單以經濟質量優化去支持就業，推動經濟，終於都要行番舊路，推動「一帶一路」，以鐵路、基建投資推動經濟，配以水喉大開，取消大部分城市的樓市調控措施，兼要求銀行要為新買家提供按揭方便。基本上，可以出嘅招都出齊，儘管A股經歷去年第四季狂升後，近日在成交萎縮下，作勢需要先來個合理調整，但放水保七的大前提下，今年中國全面加入貨幣戰爭，貨幣政策由中性轉至寬鬆，投資環境改善是值得期待。

油價具反彈條件

講番上星期個市，外媒引述消息人士話，應中央要求，中國經濟智囊提出多個與國際巨型石油企業抗衡的辦法，包括將幾間早就壟斷內地市場的石油巨無霸進行合併，中石油（00857）併中石化（00386），中海油（00883）則與中國中化集團合併，消息令幾隻股票勁升收場。

先唔講呢幾間巨無霸，業務規模其實同國際對手不相伯仲，在本土市場已經徹底壟斷，還有沒有合併節省成本的可能，但可以證明一點，北京對內地的石油石化企業的盈利能力同管治效益十分重視。小弟估計消息未必空穴來風，但相信會係極為初步階段，股市反應咁大，純粹因為油價跌了近大半年，石油類股份大弱勢累積淡友唔少，於是藉一個正面消息挾淡倉所致。

話說回頭，早排中海油公布今年資本開支預算，比去年減少兩成五至三成五之間，創三年新低，隨住國際油價大插插，油企都紛紛以縮皮減低產量增幅作應對，而國際油價已經遠低過OPEC眼中釘，美國頁岩油每桶成本70至80美元水平，一旦減產同減資本開支的效果浮現，油價有條件來一次似樣的技術反彈。

三桶油中，論勘探能力及資本開支彈性，以中石油最理想，若短期守住8.8元左右跌唔落，可密切留意。