東網電視
更多新聞短片立法會五十六名議員尋日啟程前往上海，展開兩日一夜政改訪問團，雖然政制及內地事務局局長譚志源呼籲議員以「既來之、則安之」心態訪滬，但部分泛民主派議員堅持會示威，仲自備道具出發添！其中事先講明會爭取平反六四嘅「長毛」梁國雄，尋晚抵達上海機場後即被機場人員要求搜身，兼充公六四單張同T恤，但佢堅拒就範，當場擰轉身搭飛機返港。
長毛事先張揚會帶六四T恤及單張訪滬，結果喺過境時被要求充公。
有職員用印有英國國旗嘅紙袋去上海。
何秀蘭同張國柱一氣之下都話要跟隨長毛步伐，可惜冇機位，二人惟有今朝飛返香港，無緣同京官傾政改，其餘十一名泛民議員會繼續行程。
不過，建制派嘅馬逢國就嬲到震，鬧爆長毛連累眾人喺機場等佢一個人，批評佢帶違禁品上機，分明玩嘢、博宣傳喎。雖然長毛出門遇阻滯，但唔少議員帶嘅示威道具都順利入境，好似飯盒會召集人馮檢基就帶咗盒《基本法》模型，入面有三條路軌模型，象徵三軌方案符合《基本法》規定。白鴿黨黃碧雲就帶埋泛民嘅絕食宣言出發。不過，秘書處職員仲出位，挽住個印有英國國旗圖案嘅紙袋出發。立法會主席曾鈺成出發前曾經話過，希望議員謹言慎行，唔希望到時要由佢趕議員離場，但依家睇嚟都唔使佢出手嘞！
不過，紡織及製衣界鍾國斌仲搶鏡，皆因佢將件行李交咗畀秘書處，但又唔講低自己唔會跟大隊出發，搞到成車議員呆等佢二十分鐘，先可以出發去機場。
第一手消息請下載on.cc東網
