設計圖片
政改首輪諮詢仲有唔夠一個月結束，所以除咗立法會議員到上海會見中央官員外，其實社會各界喺香港都傾得如火如荼，好似航運交通界咁，佢哋尋日就喺禮頓山社區會堂舉行咗個政改諮詢會，除邀請政改相關官員，仲有業界嘅立法會議員易志明，同運輸及房屋局副局長「邱副」邱誠武。唔知係咪始終邱副先係負責處理業界問題嘅官員，所以大家都特別關注佢，竟然喺諮詢會中，傾政改變為談論邱副嘅政績。有人大讚佢「盡責」，但有人就大鬧佢「廢柴」，直情成個批鬥會咁款。
話說尋日嘅諮詢會，大部分業界人士都講政改問題，包括支持保留立會功能界別議席，同埋認為一七年普選特首時，候選人必須通過提名委員會提名。直至「的士小巴聯盟」黎銘洪發言，佢先話希望政府可擴大業界選民基礎至運輸署認可小巴公司嘅持牌人都有選舉權，之後就突然話唔明白特首點解會繼續搵邱副做副局長，對特首呢個做法十分反對。之後的士商會嘅黃生似乎有意撐邱副：「副局長都同我哋開過無數次會，係一位盡責盡力嘅人。」但黎銘洪似乎唔多認同，當住邱副面前話，「佢冇見過我哋，係廢柴！」
四萬咁口以笑遮醜
之後再陸陸續續有人發表對政改睇法，但亦不忘評論邱副政績，有人幫邱副澄清，指政府有主動接觸業界，但有人就話唔識邱副，且對佢印象唔多好！
咁邱副又有乜反應呢？佢似乎當冇事發生過咁，全程四萬咁口展示佢嘅笑容，唔知究竟係佢嘅情緒管理能力高，抑或佢微笑當遮醜呢？不過，睇番轉頭，佢似乎係有備而來嘅，皆因佢喺諮詢會開始時致詞，就已經話呢班業界朋友平時都對政府政策好多意見，好多元性，且有多元聲音咁話。唔知佢係咪曾經有過多次同類經驗呢？
第一手消息請下載on.cc東網
