東網電視
更多新聞短片仁濟醫院董事局尋日舉行新一屆就職禮，新任主席蘇陳偉香同第一副主席林煒珊夠晒號召力，好多城中名門二代加入仁濟做總理，包括羅氏針織第三代後人Wendy羅穎怡同紀惠集團執董Jacqueline湯振玲等。英皇集團主席楊受成同兒子楊政龍、胞弟英皇金融集團董事總經理楊力成亦有現身，以行動支持冧莊做總理嘅英皇高層黃美斯，現場氣氛相當熱鬧。
蘇陳偉香話，將竭盡所能帶領仁濟醫院董事局為社會公益盡一分力。
胡郭秀萍（右）話湯振玲做善事值得支持。
楊受成（右一）偕胞弟楊力成（左一）到場，為黃美斯（左二）同林煒珊（右二）打氣。
合和實業主席「哥頓」胡應湘太太胡郭秀萍亦有到場，佢同廖創興家族新抱廖湯慧靄一齊入場，兩人十分老友。哥頓太話今次係特登嚟支持世姪女Jacqueline，事關廖太係Jacqueline嘅姑媽，廖太囝囝廖偉麟亦有現身打氣。最近有幅價值二千幾萬元嘅名畫喺拍賣後，懷疑被清潔工人當垃圾丟棄嘅奇聞，間中都會喺拍賣場買畫嘅哥頓太，一講起件事就好肉緊，話嗰幅畫係獨一無二，冇咗就冇咗喇，認真可惜喎！
同場仲見到百仁基金副主席Johnny楊華勇、「 九巴金公主」伍穎梅、富豪集團太子女羅寶文等人，佢哋都係去支持新總理Wendy，眾人仲輪住同Wendy握手合照添！即將添第二名BB嘅Johnny話，太太嘅預產期係下個月，今次太太懷孕好輕鬆，動作好大，好似唔記得自己佗緊B咁。
卸任主席嘅梁昌明，任內為仁濟籌得九千四百萬元善款，成績令人鼓舞，佢相信仁濟醫院喺新主席蘇陳偉香帶領下，能夠延續仁濟嘅行善精神。
第一手消息請下載on.cc東網
