政壇：沈祖堯以自身教國教

香港回歸十六年，近期驚見有示威人士高舉港英旗幟，港人嘅身份認同逾見模糊，但中文大學校長沈祖堯嘅一篇文章，剖析佢顆中國心，以自身教國教。

呢篇以「我的中國心」為題嘅文章，沈校長喺開首話由港出生以至喺港大畢業，佢對中國內地嘅認識都近乎零，及後爸爸帶佢返上海省親同搭船去蘇州旅遊，船上嘅種種不堪，令佢覺得自己唔屬於呢個地方，亦唔屬於呢個國家。

被嘲「蠻牛」始覺醒

直至八五年佢喺威爾斯醫院做初級醫生，處理一宗緊急事件被嘲為「蠻牛」並受批評後，佢先如夢初醒，深深體會醫院嘅醫生分三個等級，最低級就係操流利中文嘅中國籍醫生，佢心裏不禁慨嘆：中國人喺自己嘅領土上，竟然做咗二等公民，而喺八七年英國公民之門關上，佢更加有被出賣嘅感覺。

沈祖堯見到鄒市明成為首位贏得男子輕蠅量級拳賽金牌嘅中國運動員後，圍上中國國旗話：「我們不再是東亞病夫了。」佢嘅淚水奪眶而出，為自己係中國人感到自豪。

佢又話舊年睇到港人同內地遊客喺上水港鐵站打交，港人揮舞殖民地香港旗幟，升起一張海報宣稱：「中國人滾回中國去。」佢哋又叫囂：「我們是香港人。我們不是中國人。」佢嘅心下沉嘞！佢話：「若果我們不是中國人，我們又是甚麼人？在我們的基因內，每一樣東西都是與中國血脈相連的──我們的眼睛、頭髮、生活模式、對食物的偏好、對音樂、對文化的情懷……我不能，也不會，否認我是中國人。」睇完沈校長嘅心路歷程，相信大家應有所體會。