政情：伍家捐錢紀念媽姐姊妹
政情：伍家捐錢紀念媽姐姊妹
為伍家貢獻一生嘅兩個媽姐，尋日獲浸大一個研究中心命名。已故嘅永隆銀行前董事伍絜宜嘅兒子伍步剛同伍步謙等兄弟姊妹，尋日透過伍絜宜慈善基金捐出兩千萬元，支持浸大癌症炎症研究中心，仲以岑堯寬、岑碧泉命名，呢兩個係服務伍家一生嘅媽姐，湊大咗伍步剛幾兄弟姊妹，一直做到八、九十歲因癌病離世，伍家希望捐錢喺癌症方面做啲嘢，同時亦紀念兩位媽姐。
尋日嘅命名典禮喺浸大伍宜孫博士演講廳舉行，伍絜宜慈善基金董事伍步剛同弟弟伍步謙、妹妹劉伍步莊一齊出席撐場。伍步剛、伍步謙同堂兄弟伍步高都掛住懷念媽姐岑氏姊妹，伍步剛話，岑氏姊妹多年來照顧伍家起居飲食不遺餘力。八年抗戰期間，岑氏姊妹追隨伍家一齊走難上廣西避難，感情深厚，好似一家人咁親喎。
伍步剛（左）同伍步高喺伍絜宜銅像前合照。
浸大癌症炎症研究中心以媽姐岑堯寬（左）同岑碧泉（右）命名。 浸會大學提供圖片
