《Captain America Super Soldier》攞正牌打德軍

今年Marvel Comics大舉出擊，由《鐵甲奇俠2》、《雷神》打到落守尾門嘅《美國隊長》（《Captain America》），套套遊戲版都搶在電影上映前造勢。雖然美國隊長這個角色今年剛好面世70周年，年代久遠，但勝在成日孭住個金屬盾牌，造型夠易認，在遊戲中既可以擋子彈，又能夠當成回力刀飛出去車人，今次真係攞正「牌」打人！

經典角色　二戰英雄

《Captain America：Super Soldier》遊戲故事，跟快將上映嘅電影版內容好相似，都係講主角Steven Rogers本來想投考美軍對抗納粹德軍，點知體能肥佬，後來被「Rebirth」計劃睇中，將佢改造成超級士兵上戰場，肩負正常軍人無法完成嘅任務，成為「美國隊長」。漫畫角色初見於1941年，由於當時正值第二次世界大戰，故事中美國隊長的敵人理所當然是二戰時的軸心國德國同日軍，因此深受美國人歡迎，直至戰事結束後，美國隊長的人氣先至回落。

金屬盾牌　攻守全能

遊戲背景設定於40年代二戰時期的德國南部巴伐利亞山區，美國隊長要滲透入一座現代化兼高度設防的中世紀古堡，將藏於古堡內的地對空武器摧毀，令美軍可以空降部隊作戰及以空軍轟炸目標。主角最強嘅武器係一直孭喺身後嘅金屬盾牌，當敵人從遠處開槍時可以用來擋子彈，埋身肉搏時又能夠當武器使用，亦可以好似玩拋飛碟咁，用準星瞄準敵人後掟出盾牌作遠距離攻擊，真係好使好用。而且盾牌的反光位做得特別靚，身處任何地方都見到佢閃閃生光，仲搶眼過美國隊長個型仔樣。

儲氣出招　破壞力強

除無敵的金屬盾牌外，美國隊長的身手其實都唔差，拳打腳踢招式樣樣齊，動作亦流暢，遊戲中也可使出威力更強的絕招，但至少要儲滿一格Focus Meter先可以使用。好似要使出最簡單嘅Crippling Strike絕招，只要㩒實RB掣加X掣，即可一招KO對手，之後仲會有要用上兩格能源的Weaponize，以及四格能源的Super Soldier招式，破壞力更驚人，愈打愈爽。

按掣解謎　升級技能

遊戲內都唔係一味靠打，仲有多款唔同玩法，例如用上兩支Analog操控桿，解開密碼系統開門或引爆，依時間按掣的高速動作場面，以及在戰場上安裝計時炸彈等，符合故事劇情之餘，玩法亦冇咁單調。另外，透過儲分系統仲可以不斷Upgrade自己嘅能力同裝備，用來加強金屬盾牌嘅攻守能力，亦能夠學識Counter反擊技。