Fundman睇市：港鐵暫欠吸引力

繼上周四正回購50億人仔後，尋日人行再回購260億元人仔，從市場抽走游資，國家訂出今年經濟增長7.5%，即使市場預料今年內地貨幣供應唔會過緊，奈何市場無消息，收水疑雲一石激起千重浪，滬綜指跌1%，拖埋港股跌200點，收22,890點。

尋日個市，細價股完全有小型股災味道，14隻股票跌幅一成以上，跌幅榜排五十都要跌7.4%，早市路邊社消息話有中資基金，因為應付贖回班水回朝，滬深兩市的三、四線股掀起跌浪，最終連港股都火燒連環船，埋單滬深股市分別跌1%及2%，幅度唔算大，但卻係屍橫遍野，上證A股升跌股份比例1對6.7，深A更誇張，1對10.4，直頭係萬綠叢中一點紅（內地股市上升慣用紅色）。

技術走勢上，二月初港股升至23,944點，逼近恒指24,000點樓上的密集蟹貨區，開始進入調整，二月底見過22,445點，即回落1,499點或者6.2%，如果港股今次屬於中期調整，套用以往平均8至10%的回吐幅度，22,445點未必是今浪低位所在。

申請加價難度高

傳統上，基金在跌市中會先把資金泊在公用股，貪其防守力高，故有較大機會跌得少過大市。港鐵（00066）去年業績，儘管純利倒退13%至135.32億元，但基本業務盈利97.57億元，卻比分析員預測高出6至10%不等，主要受惠於地產項目分成入帳比預期多，但股價尋日一樣要跌0.75元，收報31.95元，跌幅2.3%高於大市。

昨日港鐵捱沽，除了股民要錢唔要貨的情緒驅使外，史提芬認為近日九巴加價，以及中電（00002）暗示未來幾年將大幅提高電費，引起市民大眾猛烈抨擊，港鐵的可加可減機制一直受人詬病，未來票價調整，相信所受的政治壓力更大，要在社會責任與企業利潤最大化之間搵平衡，真係唔容易。

港鐵最賺錢的，是鐵路上蓋物業的發展收入，近日特區政府連環出招壓抑樓市，先唔講會唔會影響年內推出項目，包括大圍、天水圍站，日出康城四期的銷售表現，政府取消勾地，轉為主動定期推出土地，實行要餵飽發展商，將來上蓋物業的分成比例，會唔會有負面影響，亦有待觀察。

港鐵目前嘅1.28倍市帳率，同十年平均的1.25倍差唔多，雖然業務的防守性猶在，但未必是基金短期的避險對象，31至33元都屬合理範圍，但好息之徒可能嫌棄港鐵股息較其他公用股的股息低（估計一三年2.5厘）。相反，想賭磚頭價繼續上的，或者會更進取直接去買地產股，看來除非跟隨市況出現較大的調整，否則港鐵似乎暫時吸引力都唔多夠。