盈盈誕7磅3囡囡

盈盈樂樂的BB終於出世喇!本月10日湯盈盈秘密入院,自然分娩誕下7磅3安士重囡囡Alyssa,比預產期早一星期。盈盈搞笑大爆老公錢嘉樂在她分娩後即要她充當攝影師,拍下他剪臍帶「英姿」!

現年37歲的藝人湯盈盈大前日秘密入院,為老公錢嘉樂誕下7磅3安士重BB女,取名Alyssa。嘉樂表示預產期原定是本月17日,但盈盈於10日凌晨作動,他於清晨7時左右送她到港島嘉諾撒醫院,囡囡於下午約12時半「搶閘」出世。BB天生美人胚子,面形與媽咪相近,頭髮多多,十分可愛。

興奮大叫Amazing

初為人父的嘉樂昨日與盈盈十指緊扣於醫院外受訪,盈盈精神十足,只是腹部稍稍隆起。為答謝老婆,嘉樂四度親吻盈盈,又滔滔不絕大談生女過程,他笑言原本不想入產房,但在護士的慫恿下才改變初衷,他透露盈盈分娩前曾一度表示冇氣力,更問他:「我會唔會生唔到?」嘉樂指當時自己即如拍動作片般武指上身安撫老婆:「唔好諗咁多,深呼吸!定啲嚟!唔好諗做唔做到,要諗點樣去做到!」

嘉樂搞笑地形容盈盈分娩情況:「佢好似用錯力喺面度,我教佢要似『屙砵砵』咁。姑娘叫我正面睇,但我有保留,想有番啲幻想。」盈盈表示生女過程痛約兩小時,自爆聽到囡囡第一下喊聲時,兩夫婦感動得即時標淚,嘉樂此時卻笑稱落淚是「交戲」:「佢喊到好似噴水池咁,我都係小噴水池啦!真係好慶幸入咗產房,件事好微妙、神奇、好珍惜,好Amazing、Incredible同Wonderful!」

親手為囡囡剪臍帶的嘉樂續說:「原本擔心手勢唔好搞到個女肚臍唔靚,點知個醫生問我係唔係怕血,心諗我拍慣動作片點會怕!最初我以為一下過,但原來好硬,要剪幾下。」他更興奮得要剛產女、仍躺在床上的盈盈充當攝影師,盈盈笑說:「佢呀!即刻隊部相機畀我叫我幫佢影相呀!我幫佢影咗囉!」嘉樂解釋是要紓緩當時緊張氣氛,又說:「好開心,估唔到嘉樂仔可以做老竇,到依家好似發夢咁。」

想追多個湊「好」字

問到囡囡似誰,盈盈笑言當然似自己,嘉樂則說:「姑娘話似我,我即刻諗起Bonnie(《盛女愛作戰》參賽者),咁就梗係似阿媽好啦!婆婆、嫲嫲都話似佢,囡囡對眼好闊,一定眼大似阿媽。」表示未知是仔定女時,曾考慮改名「錢進」,如果是女則用「錢晴」,但一切交由父親「修飾」名字,他又承認想追多個BB:「希望追個細佬啦!」盈盈則透露已請「陪月」,會暫時休息,做全職媽媽,並會餵人奶,而囡囡已於較早時間返回家中。訪問後,盈樂先返上病房,之後再步出,並登上保母車離開醫院。嘉樂昨晚在微博上載一家三口幸福照:「非常感恩,原來做爸爸是很幸福的事情!」

今次盈盈自然分娩,婦產科醫生余啟文表示比開刀生育好:「雖然自然生痛啲,但較快康復,而且唔使麻醉,危險性較低,唔會有頭痛、震抖等副作用,而且可以早啲餵人奶。」

第一手消息請下載on.cc東方互動iPhone/iPad/Android/Windows Phone Apps

專案組

湯盈盈為錢嘉樂誕下首個愛情結晶——寶貝女Alyssa。

錫晒老婆
錢嘉樂接盈盈出院肉緊錫錫,並由助手將BB的禮物放上車。

迎B賀禮

拖實上車