Fundman睇市：大昌行可搭順風車

有番咁上下股齡的，都知股市一係升一係跌，尤其愈唔成熟的市場，愈受投資情緒影響。君可見，去年第三、四季內地經濟數據，尤其是PMI數字有見底回升的迹象，但A股唔理繼續跌，直到十二月四日見1,949點三年半低位。不過，一掉轉行同樣都唔講得笑，個半月彈番去2,325點，累升19.3%，在同期全球主要市場中排第一。

內地股市的表現，說明這類大上大落市場，有時入市時間比任何因素重要，苦等三年，唔及個半月前入市咁時來運到。回看港股，雖然重磅股中移（00941）漸露疲態，港匯也強勢不再，昨日回到7.7530的接近三個月低位，惟A股狂牛唔願收掣，限制了港股每次調整的幅度。昨日恒指一度跌過百點，收市僅跌31點，報23,381點，主板成交750億元，是踏入一三年以來最少。

查實港股於一月二日復市狂升655點後，近九個交易日得400多點波幅，睇指數悶死隔籬，主要是資金圍住三四五線股炒到不亦樂乎。有趣是，近日美股也有同樣情況，三大指數上落唔大，但細價股組成的Rusell2000指數卻創下歷史新高，短期股市風險係咪好大，可以參考吓美銀美林所做的一項統計。

芬佬仍未買夠貨

該行年初搵基金經理作一個統計，發現51%大孖沙表示，短期會在投資組合中增持股票，數字較一二年初足足多近四倍，對環球經濟增長預期，也是一百八十度轉變，59%基金經理預期未來一年環球經濟逐漸好轉，與一年前悲觀睇法實在差天共地。最重要是大多數芬佬把口就話睇好股市，可是綜合基金淨持現金比重，卻仍徘徊在3.8%頗中性水平，證實芬佬個腦同個倉並無一致行動，基金唔夠貨情況，對比去年第四季並無太大改善（當時現金比約4%）。睇形勢，追指數成分股以外落後股份的情況，可能仲會持續多一段時間。

最後補充，基金經理連續四個月增加新興市場投資比重，一月再升40%，年初最睇好的三個股市包括俄羅斯、中國及土耳其，最睇好行業包括內部消費類別，科技及金融股。

日本新任首相安倍晉三，不斷重複要求日本央行擴大量寬措施救經濟，日圓匯價在其指揮棒下跌得誇張，九月時仲係78兌1美元，前日最低跌到落89.67，短短一季貶值一成五，是近年罕見，可以預期貶值潮有利提升日本產品出口競爭力。

邊際利潤料改善

從事汽車代理業務的大昌行（01828），八成收入來自汽車業務，日系車佔當中一半，去年上半年業績麻麻，多少受高圓匯影響，港澳業務營業額升13.4%，邊際利潤因為圓匯高企收窄0.7個百分點，但隨着日圓貶值，這情況今年應可顯著改善。

受財務費用上升及投資物業重估收益淨額減少等非經營因素拖累，大昌行去年六月底止中期賺6.5億元，按年跌18.9%，市場保守估計去年全年賺12.78億元，今年升至14.46億元，相當於10.5倍市盈率，估值吸引。近日大昌行股價升穿十一月初高位8.21元後，愈升愈有，一月至今甚至即市從未觸及10日線，強勢畢呈，相信圓匯貶值趨勢已成，若大昌行股價有機調整至8.5至8.6元，不妨開始買第一注。