豆斗解謎唔使追仔

婚後誕下三女的經典女神邱淑貞，早前被指靠法王心咒求男胎，不過她昨日出席法王活動時，罕有地開腔澄清，直言與老公沈嘉偉從來沒有追「慈姑椗」的傳統觀念，還大讚生女好過生仔，而且現今科技先進，她若要追仔早就成事！

娛樂圈皈依我佛的藝人眾多，第十七世噶瑪巴大寶法王聽列泰耶多傑昨日假灣仔舉行記者會，信徒邱淑貞（豆斗）、郭富城及前歌手甄楚倩等陪伴左右列席，法王此行為了在港弘揚佛法，並即席誦經3分鐘，為善信及傳媒祝福。

「要生一早搞掂」

已育有三女、現年45歲的豆斗穿上西裝褸及鬆身裙，皮膚保養得宜，容光煥發，薄施脂粉依然索爆！息影後甚少接受訪問的豆斗，難得與記者侃侃而談。去年11月，她穿上鬆身衫及平底鞋出席錢嘉樂與湯盈盈的婚宴，當時她腹部微隆，一度被傳再度懷孕，有報道更指她靠法王心咒而懷男胎， 惟她作出澄清：「從來冇咁嘅事，點解一定要生仔？同老公冇要生仔嘅傳統觀念！其實依家科技咁先進，如果要生，一早可以搞，我想順其自然！」她更大讚生女好過生仔：「生女會照顧父母多啲，年紀大咗都會帶父母睇醫生！」

禁女兒入娛圈

豆斗認為傳聞有損法王名聲：「呢啲傳聞冤枉咗師傅，渲染咗，好似搵親師傅就要呢樣嘢，如果個個要師傅求子，佢咪好煩？」她已信佛近20年，老公沈嘉偉則沒有宗教信仰，但會支持她。而三個囡囡都見過法王：「佢哋好乖，見我拜乜就拜乜，佛學教育對成長好好，教導小朋友慈悲、和諧相處。」提到其11歲大女沈月愈大愈似她，不過她認為二人只是感覺相似，細看下其實不似，而她暫時不會讓囡囡入行，最緊要先讀好書。

另外，法王在未來的兩周尚有多個弘法活動，舉行法會及灌頂後，還有佛學講座及論壇，月底會有放生活動及謝師晚宴。