Fundman睇市：保險股反彈潛力厚

聯儲局在剛過去的議息會議中，第一次加入利率預期，將超低息期限延長至二○一四年，不過就未有提及有新一輪QE。上星期五，美國公布第四季經濟增長2.8%，儘管比前一季大幅躍升一個巴仙，可惜依然低過分析員預期，道指跌74點收市。

事實上，撇除存貨上升因素，上季GDP只有0.8%升幅，不過，第四季經濟唔好，或是一件好事，至少伯南克在未來兩次議息，推出QE3會變得振振有詞。美匯指數周五去到78.9，同上月底高位比較，累積已回落3.52%，再睇金價，由去年底1,523美元彈番去兩個月高位1,733美元收市，明顯匯市春江鴨熱好晒身，炒緊QE3的可能性。短期美匯跌，商品升，極有機會成為二月的投資主題。

歐債危機殺傷力減

國際評級機構惠譽，上周五歐洲時段調低意大利、西班牙等五隻「歐豬」主權信用評級，前景全部負面，歐股通通見反高潮，然而幾隻「歐豬」的國債息卻未見受影響，意大利十年債息終於跌穿6厘，去到5.86厘，西班牙亦去到4.9厘。長期再融資操作（LTRO）在二、三月「歐豬」贖債高峰之前繼續發揮效果，相信歐債危機短期已經唔再係推低大市的有力藉口。

港股跨年做出六連升，上周五收報20,501點，不經不覺，今浪港股由萬八點樓下起步，反彈已超過一成。筆者所見，今浪唔少歐資基金在LTRO之後，都轉趨樂觀，入市買番啲貨，反而唔少美資及本地基金，普遍有太多現金，跑輸指標指數成條街的煩惱，這情況不能排除大市會繼續出現挾倉，將指數推穿兩個技術上的重要阻力，包括250日線21,138點，以及去年八月五日留低的巨型下跌裂口21,017點，但要小心的是，上周五唔少支持今次升浪的內銀、保險股高位有力弱的情況，反之大市要靠中移（00941）及滙控（00005）兩隻大落後股撐住，似乎短期有先來一次回吐的迹象。

今日A股重開，由A50（02823）較新華富時指數出現11.16%溢價，創七個月新高，估計今日A股「最低消費」有機會開高3至4%。對比歐美股市，內地投資者肯定是近期全球相對較審慎的市場，滬綜指春節前收2,319點，只係比去年低位2,132點高出8.7%，就連恒指也從16,170點反彈足足26.7%。

回顧中央已着手調整緊縮政策，開始採取定點寬鬆措施，提供較多流動性支持經濟，A股的短期反彈潛力，可能較港股更甚，可惜港人沒有太多投資A股的渠道。ETF、A股基金或者保險股，都是比較理想的選擇。早在去年十一、十二月，史提芬開始對保險股改觀，一來A股估值去到歷史低位，保險業受股市影響的投資收入，再變壞空間未必太大，筆者估計可能在六至十二個月觸底（今日看來比預期更早）。其次，保費收入經過去年第三、四季慘不忍睹的數據後，今年第一、二季或者仍無大進展，但去到第三、四季，在比較基數較低下，重現增長的機會唔細，從營運及市場客觀環境，保險股都已經處於行業周期底部，筆者心水繼續是估值落後但增長較強的新華（01336），以及高啤打值的平保（02318）。