視帝祥仔：我有社交焦慮症

入行26年的黎耀祥，於09及10年連奪兩屆視帝，又曾闖影壇4年。當不少好戲之人往外發展之際，祥仔卻因自小已患有的「社交焦慮症」而阻礙前進，但他並不着急，只要想起家庭和兒子便滿足的他自嘲：「我冇大志！」本報將一連五日公開祥仔對兒子、事業的睇法及亡母對他影響深遠的感受。

其實唔係唔鍾意拍內地劇或電影，係好多考慮。首先講電影，我喺98至02年都出過去拍咗4年電影，但唔啱我，我好怕陌生人同陌生環境！依家做咁多活動又做咗咁耐，當然好啲，但心底仍然係唔習慣，所以冇乜新朋友或新圈子，圍內一班人嚟嚟去去都係嗰班！

拍電影每次都唔同公司，Office又唔同、Crew又唔同、成班人都唔同，所以每次要從頭去適應一班新嘅人，見咁多唔同嘅人，我都唔敢講嘢……好驚o架！雖然幾十歲人，始終克服唔到，可能係自細性格都好怕人，其實我係有「社交焦慮症」，但我做演員喎……上天就係咁諷刺！以前讀書，返學時隔籬班房開門，我就唔出班房門口住，等人哋出先，我怕唔知同人哋講乜呀！

「我冇大志」

正如拍電影，我要花好多時間去熱身，又要克服心理障礙先可以投入，如果你問我鍾意邊套電影？係冇一部鍾意，因為自己都做得唔好，唔喺狀態！要我克服個人性格上嘅問題，對我嚟講幾難，所以我都唔嚮往拍電影，相反我返TVB仲開心，TVB個個都熟，梳、化、服行埋個個都係廿幾年嘅老臣子，我會好放心、好信任咁喺呢個環境工作，講嘢都唔使擔心。比起喺外邊，我都唔敢亂講笑，一陣得罪人又怕被人話係大哥，我見呢類語言上嘅誤會太多！演戲都要克服客觀環境，外面咁多人都唔熟，Crew又唔熟、Lighting又唔熟，但我喺TVB可以好放肆咁講笑、玩呀……好似燈光，我會叫就吓我個眼袋，換轉喺出面我就好怕講，人家聽完唔知會話：「當我冇料到咩？」

唔想進一步有成就咩？我會話：「我冇大志！」眼見好多電視出身嘅都出晒去拍電影，好似張家輝。劉青雲都有同我提內地巿場，但我都唔急，我演戲唔係為咩成就，演戲為活喺自己世界，我覺得好享受、好安全、好放鬆、毫無憂慮，所以我唔拍內地劇都係呢個原因，返到去人生路不熟，唯一吸引係錢，又可以同好多實力派演員合作。有時諗，作為演員都要拍吓呢類製作就不枉此生！鄧萃雯同我講唔少次話介紹製作人畀我識，我都話唔使住，隨緣啦！

Profile

現年47歲的黎耀祥（Wayne），85年報讀短期演藝訓練課程，得李添勝賞識獲推薦入無綫藝訓班，86年由閒角做起。他曾轉投亞視，02年重返無綫，直至09年憑《巾幗梟雄》「柴九」及10年的《義海豪情》「劉醒」角色連續兩屆贏得視帝。去年中，《義海》尚未於內地播映，但他憑「劉醒」入圍《第十七屆上海電視節》「白玉蘭獎」的「最佳男演員」，成首位入圍的香港男演員。