Fundman睇市：內險股吸引力跌WATT

尋日三點鐘前，以為港股又嚟近期最興嘅「高開低收」，尤其三點左右，瑞銀公布有交易員因違規交易，損手20億美元（約156億港元），期指一度隊穿19,900點，以為好友大勢已去，殊不知歐股開市，完全無將瑞銀第三季業績將因此見紅當一回事，照升如儀，也帶動港股三點後出現死貓彈。

正所謂一件污兩件穢，相對大有機會在一兩個月內承認賴債的希臘，20億美元真係濕濕碎，到底係投資者哀莫大於心死？抑或市場開始對壞消息無反應？（常被視為股市見底徵兆），史提芬認為都係吹水居多，多睇兩三日，看18,600點守唔守得住，抑或好友能否順利補回19,303至19,808點的裂口再向上攻，更加實際。事實歐美股市恐慌指數（VIX）紛紛從高位回落，執筆時，德股由低位反彈超過9%，儘管港股向有「基金ATM」的特質，但都無可能長期同外圍股市背馳，似乎一次像樣的反彈，基本條件已經存在，只等基金經理按掣出招。

思捷噩夢未完結

思捷（00330）事先張揚，需要為品牌進行大規模重組，市場預期有兩個可能性︰一，係長痛不如短痛，大規模重組，將所有損失一次過反映在業績上，成績表會相當難睇，但可以顯示管理層對思捷的承擔及決心。二，只作小修小補重組，減低一次過衝擊，但無論係邊一個故事，股價都難免受到拖累。睇番思捷全年業績嚇壞人，賺7,900萬，減一減上半年所賺的21.4億元，換言之，下半年蝕20.61億元，通告指關店撥備、把北美業務剝離及廠房減值，帳面唔見24億元，令業績低過市場估計下限，股價再插17.6%，跌到15.08元，重返沙士價。

筆者不能不認衰，月初仲叫看官唔好賤價求售，似乎思捷的問題比預期更嚴重，六月底存貨去到42.2億，按年升七成二，對比無升跌的銷售額，令人懷疑未來半年，可能需要為過期存貨撥備。

內險股的八月營運數據麻麻，國壽（02628）保費收入只得4.1%，按月增長，低過七月份的5.2%；中國太平（00966）同七月相若，八月升5.8%。大行估計，平保（02318）應該會跑贏同業，但都會由七月接近15%增長，收窄到8%。

過去內險股一直存有高溢價，源於投資者透過內險股曲線投資A股有關，可惜A股強勢不再，內險股保費收入如無突破，單靠無驚喜的債券及存款投資，業績都幾難有驚喜。君可見幾隻內險股，估值都已由高峰回落甚多，一二年預測市盈率，國壽只係11.5倍、平保13.6倍，都係掛牌以來最低。

A股指標滬綜指，金融海嘯後以大型三角形走勢運行，曾高見3,477點，最低2,319點，走勢似快到決勝時刻。悲觀的，認為現水平2,479點假如再跌多160點左右，跌穿三角形低位，後市無眼睇。倒過來，有人認為A股已屆入市良機，主要建基於預期市盈率跌至12倍樓下，創歷史新低，只要中國經濟唔出現硬着陸，股市估值其實已經平到極。不過，如果賭A股反彈，史提芬估計在股市投資比例已經比高峰期大為縮水的內險股，未必係最受惠的一群，反而直接押注券商股，爆炸力將會較大（例如將上市的中信証券）。