Fundman睇市：銀泰百貨業績報佳音

周三，港股再挾330點，收報20,534點，大市成交754億，但單係「空軍墳墓」建行（00939）批股上板就佔去81億，換言之，尋日大升市成交真係唔算特別多，完全符合跌市死貓彈的特色。

大挾倉，有人認為係基金在八月結算日粉飾櫥窗所致，話就話八月份港股累跌近9%，比歐洲股市平均15%算跌得少，可是，在歐債危機加埋美國國債被剔除AAA評級的八月，仲揸重貨的，試問有幾多人可以全身而退，身家損失低於大市跌幅？

國際大鱷齊損手

輸到心灰意冷，不妨睇睇幾個國際大鱷，死傷絕對同散戶無異，債王格羅斯旗艦基金因為睇錯市，賭美債跌最後卻大升，今年在589隻債券基金排名中，排501位，早兩日終於出嚟認低威承認睇錯；沽神保爾森，先後揸重嘉漢林業、美銀美林及惠普，通通是山泥傾瀉級別的弱勢股，單係八月基金就輸近兩成二。連這一班大孖沙都搞成咁，作為散戶，只能盡量做到持盈保泰，市況唔明朗就減少入市，或者趁機買高現金流高息的股份自保。

尋日收市前大市被挾到飛起，缸邊話係MSCI指數權重變動所致。不過，幾隻主要受影響港股包括中行（03988）、友邦（01299）、農行（01288）、恒地（00012）、新創建（00659）、威高（01066）及東岳（00189），除恒地之外，成交未算特別標青，摩通計過數，話追隨指數基金，估計要在港股沽6,800萬美元，再換入1.16億美元的比重增加者。以淨買入4,800萬美元計，相當於3.74億港元，佔大市成交唔夠0.5%，下晝推高恒指200點？似乎其影響是心理大於實際。

內地百貨股陸續公布中期成績表，仲以為會受貨幣政策從緊影響，殊不知龍頭百盛（03368）上半年同店銷售仍升13.3%，銀泰（01833）上半年同店銷售更大升28.4%，幅度和金鷹（03308）的28.7%睇齊，上半年純利大升60.3%至4.81億元（人民幣．下同），看來零售百貨業，依然是少數不受宏觀政策影響的板塊。

聯營貢獻三級跳

回顧上半年純利增長得以高於收入升幅，主要得益於幾點因素，一是銀泰的營運槓桿有所提高，儘管有新店開張及加強商品組合，但特許專營銷售的佣金比率跌幅低過預期，只是由18.2%降至18%，而且，北京燕莎友誼商城收入入帳，令聯營貢獻三級跳，由去年同期4,260萬躍升至1.36億元。和大部分內地百貨一樣，高通脹下令內地百貨業經營成本壓力增加，上半年員工成本增幅60.3%，更多新舖面開始營業，購買貨品及存貨變動亦錄得64.5%升幅。

綜合大行預測銀泰今年賺8.26億，市盈率23.5倍，未來兩年是新店投入營運的高峰期，下半年有四間，明年有六間，預期不難推動業績保持兩成左右的增長。值得留意，近期股價幾次接近11港元水平立即見支持，在理想業績預期下，現水平入市風險應該十分有限。