Fundman睇市：達芙妮業務高增長

港股周一復市，又一次令捧場客失望，恒指反彈仲係止於22,000點關口前，港股收市倒跌70點，報21,804點，成交極奀，得514億元，是一個半月最低，大市再一次考驗六月中旬低位21,508點支持的機會愈來愈大。

大弱勢的內銀股，跌市中反而見死貓彈，四大內銀尋日只得中行（03988）平收，其餘3隻報升，主要多得農行（01288）管理層出來派定心丸，話持H股發行股數三成六之多的三大基礎股東─卡塔爾投資局、科威特投資局及渣打銀行，無意在禁售期結束後立即減持，消息令農行股價反彈0.11元，收報4.06元。

筆者的非正式統計，身邊賓架朋友對內銀股睇法出奇咁一致，個個獨沽一味耍手擰頭，人人都怕地方政府債務問題，拖累銀行壞帳飛升，至於到底有幾大鑊，就各有各估計。

自從中國為加入世界貿易組識，內地銀行業在十年前開始改革，政府大規模注資補貼下，不良貸款比重由○三年前的雙位數，降至今時今日只得1至2%，是內銀業績好似坐火箭咁飆升的原動力。到美國○八年金融海嘯，中央投入4萬億人民幣銀彈大搞基建刺激經濟，今日到底有幾多變成地方政府的大白象？最終幾多不良貸款要由銀行承擔？仍然是眾說紛紜。

內銀股後市變數多

內銀股市盈率六至九倍，以海嘯前標準嚟睇當然平，保守估計假如不良貸款回升去到3至4%，銀行股業績可以由一○年基礎蒸發三至五成，也因此有唔少人認為，內銀其實一啲都唔算平，更遑論不良貸款比重升到5至6%！可以相信，內地銀行不良貸款見底回升，是必然趨勢，但幅度會有多大？同其他人一樣，筆者都只係得個估字，投資經理最怕無法預測情況，咁多變數底下，內銀股要有高估值絕非易事，或者市場已不再以傳統市盈率高低的思維，衡量買與不買，但要在內銀股波幅中搵錢，似乎只有精於捕捉市場情緒的高手，才有勝望。

女裝鞋生產商達芙妮（00210）公布第二季同店銷售，由Q1的1%大幅增長至Q2的32%，刺激股價連升三日，昨收8.68元，升0.31元，今個月累積升幅達兩成五。數字增幅誇張，主要係比較基數低，去年同期供應商受勞工短缺影響，產品延遲付運，今年再無同類響，但綜合上半年同店銷售錄得17%增長，加埋平均售價升5%，足以使分析員對業績全面向上修正。

美林剛剛調高達芙妮一一及一二年盈利預測4及5%，去到9.01億及11.45億元，反觀市場預測則分別是8.39億及10.2億元，一一年市盈率十八倍，一二年則進一步回落至14.8倍。唔少人鍾意以鞋王百麗（01880）同達芙妮比較，前者未來兩年預計市盈率分別是二十六及二十二倍，比後者高出44及48%。

短線可候回吐吸納

市值相差9.6倍，論賺錢能力，百麗也是達芙妮的四倍多，規模及經營模式有別，其實不太適合直接比較。以股論股，未來三年達芙妮盈利預測平均增長24至25%，PEG是0.62倍，都算有吸引力，公司慣常在八月下旬公布中期業績，未來幾日會進入業績前blackout，急升後短期可能反覆，未有貨者可在8至8.3元附近入貨。