Fundman睇市：思捷盈利能力唔輸蝕

希臘國會順利通過緊縮財政方案，歐債危機由深切治療推番去嚴重病房。那邊廂，六月份中國採購經理指數（PMI）令人失望，跌到落50.9，差過市場預期，越近50的分水嶺，意味着經濟擴張力度減弱。市場擔心六、七月份PMI可能跌穿50。

六月初華爾街怕QE2玩完，道指跌到最低11,862點，當QE2真係同大家講拜拜，壞消息出盡，華爾股反而掉番轉頭炒，道指在上周四及上周五兩個交易日累升321點，報12,582點，突破五月底高位12,574點，同海嘯後高位12,876點相差唔夠300點。

港股今日會點走，係受中國差勁的六月份PMI影響？抑或跟美股再升300點？上周四港股半年結的挾倉，升336點，報22,398點，但成交僅741億元，假如今日港股跟美股開高兩三百點，又再逼近22,700至22,900點的阻力區，如果半年結前無買，今日至高追似乎係唔多划算。

恒指半年累跌637點，點數損失睇落唔多，得，但唔少五、六月份基金報告所見，今年能夠跑贏大市的基金比例，印象中比過去幾年更少。歸納上半年輸死人的幾個因素，一係唔少大孖沙估QE2完結前的一段時間，債券有升無跌，然而十年債息由3.5厘碌到落六月底最低見2.85厘，唔少債券基金睇錯市輸到瞓。

聯通估值溢價高

港股參與者同樣難做，指數重磅股如內銀、保險及電訊（主要係中移（00941）），都處於相對弱勢，部分中小市值的基金炒股，好似中投三保，去到五、六月份，又出現民企洗倉潮，跌得一仆一碌，唔少基金偷雞唔到，結果賺頭蝕尾。且看第三季內地通脹見頂，緊縮政策隨之結束，市況應較上半年明朗。

半年結，上半年表現最好的係累積升41%的聯通（00762），不過，近期太多大行質疑3G上客放緩問題，且估值較中移存在太高溢價，雖然筆者唔信蘋果公司短期可以幫中移生產TD制式iphone，但沽聯通買中移，仍然是吸引的中線長短倉佳選。至於半年最差的，是思捷（00330）及出口股利豐（00494），分別跌34.59%及31.26%。

撇開瑞銀分析員死咬着利豐唔放，不斷唱淡，事實上，利豐多年高增長，往績市盈率27.7倍，比恒指平均十二倍高出一倍有多，只要稍有營運數據未達標或者被大行唱淡，都難免對這類高估值股帶來震盪。

股息率持續高企

思捷的表現的確令筆者失望，在歐舒丹（00973）、新秀麗（01910）等跨國消費品品牌大受投資者歡迎下，思捷弱勢更覺明顯，往績市盈率7.2倍，即使較悲觀假設，未來業績可能再從一○年的基礎42.2億元，跌一至一成五（高峰期是○八年64.5億元），歐洲佔總收入八成三的時裝品牌估值在十倍附近。

今時今日，基金經理情願用高估值買有增長故事的公司，也不願沾手幾年間，在歐洲銷售收入無大驚喜的思捷，但品牌毛利及股本回報唔錯，也經營着一門相當具盈利能力的生意，股息率幾乎等同內房股發債水平！若下半年在藍籌股中揀睇好及睇淡的，筆者會揀思捷及聯通。