Fundman睇市：東風車股比併高一班

正當QE2玩完前夕，中央冒住經濟硬着陸的風險，繼續緊縮政策，控制通脹，現在看來，明年環球經濟是好是壞，有點踩鋼線的感覺。有云大智慧不如睇趨勢，面對眾多不明朗因素，儘管股神話人們害怕時要學懂貪婪，但世上又有幾多人做得到？截至六月八日的一個星期，全球股票基金錄得73億美元淨流出（主要是ETF及傳統基金），相反，債券市場出現去年七月以來最大淨流入，達59億美元，明顯大孖沙睇唔通美國聯儲局及人行兩大財金決策單位的一寬一緊政策下，下半年全球經濟會搞成點，索性齊齊抱着現金就是王，索性少做少錯，將錢泊入債市等運到。

恒指上周四所見，各種技術見底訊號都出齊，雙底倒轉錘頭，加埋跌穿250日線拗腰上番嚟，以為周五好友有力反攻，可惜始終形勢比人強，B股恐怖到跌超過5%，儘管話指數仲係企在過去幾個月的22,000至25,000點橫行區內，但睇番一啲知名民企，股災味道濃到極，超大（00682）去年六月仲响9元樓上，今日得番3元左右，唔見咗三分之二。即使上市無耐、全國最大民營船廠熔盛重工（01101），短短半年都出現兩碗水煲埋一碗嘅情況，上星期去到4元，得番招股價8元一半，炒壞咗嘅民企遇上咁嘅時勢，要返上水面，難度分肯定有9.9。

跌穿二萬二唔出奇

內地股市估值貼住歷史低位，港股亦唔夠十二倍，同樣處於相對便宜水平，但眼前形勢，唔單止民企唔掂，筆者在其他板塊股睇來睇去，短期又真係無咩胃口。內銀未來兩月受限售股解禁影響，沽空盤浸浸落，也怕一三年要提高資本要求，短期未必大跌，但要升唔易。內房股近月銷售數據已從首季回落，怕部分大發展商年中前後可能要調低全年銷售目標。內需本來係筆者至愛，可惜短期跑贏大市太多，通街平貨下再追這類貴價outperformer，實在過唔到自己價值投資信念一關。恒指短期跌穿22,000點不足為奇，筆者相信股市再跌幅度未必太大，只係市場如果見到內地通脹數據見頂（估計在未來三個月），會比較有信心入市。

中央逐漸從補貼政策中退出，加上三月份日本地震，使零部件供應鏈受影響，唔少人睇淡今年內地汽車股表現。事實上， 比亞迪（01211）、吉利（00175）、長汽（02333）及廣汽（02238），股價都逼近今年低位，唯獨東風（00489）近期有愈戰愈勇之勢，由過去兩個月低位12元，逐步回升去到接近14元水平。

全年銷售目標可達

東風從來畀筆者感覺係抵食夾大件，今年首五個月銷車58.4萬架，比吉利、長汽及廣汽總和仲要多，而預期市盈率卻不足九倍，是幾隻車股估值的中下限範圍。早前公布五月份銷售數字，東風唔算標青，乘用車銷售11.4萬架，按年升3%但按月跌7%，跑輸升4%及跌6%的全國數字。銷售好股價升唔奇，但銷售差而股價不跌，就引起筆者興趣。

影響東風銷售，主要係因為較大比重零部件來自日本合營企業，供應鏈流程受到地震影響。不過，早前管理層已再次強調，全年216萬架銷售目標不變，而最近大行消息亦話，其合作的日本車廠零部件供應較預期提早恢復，這對東風下半年追補失地絕對有利。筆者相信未來兩季，股價跑贏其他車股的情況會持續，應有機會挑戰16元樓上。