Fundman睇市：內房股大有條件炒落後

港股由去年聖誕後低位22,529點起步，一輪衝鋒去到上周中高位24,434點，但當周四內地十二月份通脹以及第四季經濟增長數字一出，港股立即洩晒氣，星期五連A股死貓彈超過1%都唔願跟，恒指收市跌126點，報23,876點。

中美峰會前後，人民幣國際化、升值等議題，幾乎日日搶佔經濟版頭條位置，不過諾貝爾經濟學獎得主蒙代爾卻認為，人民幣最好保持現狀，維持固定匯率，強調選擇大幅升值只會換來破壞性後果，可能危及中國周邊地區經濟貿易的穩定。查實人民幣自從匯改以來，大部分時間保持穩定升值步伐，但美國似乎仲係唔多滿意，今次峰會上，胡總一如過往，無積極回應美國對人民幣升值的訴求，但上周末外電消息話，美方官員認為中方對升值立場已有點軟化。

匯改以來，中國在對外貿易盈餘以至通脹上，幾乎睇唔到一絲改善，到底畀人民幣大幅升值，對中國經濟有甚麼好處？自問才疏學淺，勉強講，或者中國企業借落外債變相貶值，好似中國的「飛機外交」，年年航空公司同美歐政府「握手」買落大批飛機，欠落的美元歐元負債，折回人民幣縮咗水還少啲。然而，年年升3至5%，升值預期勢必令更多熱錢透過唔同途徑湧入，結果係點，由漸漸失控的流動性及通脹情況，可見一二。到底升值係幫到壓抑通脹？抑或激發通脹惡化？大家不妨好好想想。

內銀股平價有理由

目前，內地A股藍籌二○一一年平均市盈率為十三倍，處於歷史低位，內銀股仲誇張，以大行預測盈利計算，建行（00939）得8.8倍，工行（01398）8.3倍，中行（03988）更得7.5倍，通通屬於過萬億市值的國家級銀行，估值可以平到咁，可見大孖沙考慮中國通脹有排未見頂（人行需要採取進一步緊縮政策），以及銀行體系面對的壞帳見底回升可能性，因而加入了相當的高風險溢價。此時此刻，中國經濟穩定重要過一切，中南海斷唔會畀人民幣來個大升值引起動盪。不妨睇人民幣一年期不交割期貨，最近完全無跟人民幣現貨中間價向上，無升穿去年十月中高位6.4算，多少可以看到需要匯率對沖的大企業睇法相近，小心峰會過後，炒人民幣升值的熱潮，來得快去得更快。

高息內房債夠吸引

要數去年落後板塊非內房股莫屬，近期大行興起炒落後，尤其中央要樓價跌，樓價死都唔肯跌之後，大行睇中內房股股價已經悶足一年，全年銷售數據大部分已經曝光，至少未來三個月，在全年業績公布前都安全，分析員也樂於向投資者推介內房股，筆者相信，這一波內房炒落後的風氣，多炒一兩個月絕對唔出奇，一些較具融資實力的，像富力（02777）、中海（00688）一類，應該風險有限。

早前唔少內房發債，部分年息去到13至13.5厘，說穿了是人行從緊政策的後遺症。內房股融資唔易，惟有以高息作招徠，並以美元計價，一旦人仔大升值，實際息率唔使咁高。老實說，筆者對這些債券更感興趣，一來只信人仔僅小幅升值，最重要的是，○八年金融海嘯畀大家睇到，內房借錢愈狼，內地銀行愈唔想佢死的事實，這從當日唔少債息去到30甚至50厘的內房公司今日還健在可見一二。