期指攻略：24400樓下部署建好倉
連升六日的港股終於要抖抖，地產股頻伸手，恒隆地產（00101）批完輪到信置（00083），市場擔心陸續有來，一眾未攞錢的地產股都受到牽連，加埋內銀股供股權即將出籠，唔少唔準備參與供股的基金及策略股東，都掟正股套戥，加速了港股調整，恒指尋日跌253點，收報24,710點。
尋日期指走勢都算蠱惑，早市跌穿周一的24,700點即市支持，但開市一小時左右居然倒升，重返24,900點樓上，當市場以為周一先跌後升市況重演之際，午市前後支持力卻頓然全失，收市更低於24,700點，技術走勢麻麻。事實上，港股也需要時間理順一下九月初至今的龐大升幅。
美匯走勢具啟示作用
資金市到底可維持幾耐？無人知，值得留意，QE2的威力雖在股市繼續炒作，可是匯市已開始消化得八八九九，美匯指數近日開始在76水平有喘定迹象，港股會否出現整固，似乎睇美匯會有一定的預示功能。
無倉一身輕，筆者樂見大市調整等揸倉機會重臨。十一月短短幾個交易日，大市共留低三個上升裂口，分別為23,366點、24,345點及24,732點，昨日基本已補回24,550至24,732點的裂口，進一步回補24,345點的機會唔細，期指如果調整到24,400樓下，開始進入「射程範圍」，筆者會再開好倉。
