Fundman睇市：東氣核電業務成亮點

期指結算日，並無好淡雙方激烈廝殺，成交更創十月以來最低紀錄，只得760億元，說穿了，美元唔肯再跌，有短期見底迹象，人民幣升勢滯滯哋，而九、十兩個月，賭美國聯儲局QE2大印銀紙的基金，要買嘅早已買齊，仲有甚麼消息可炒？看來未來幾日美國幾個重要經濟數據會成為市場焦點，但港股成交縮水加埋指數連穿10日及20日線（23,532點及23,264點），結算之後，下周三議息結果公布前，睇情形仲係比較兇險。恒指尋日升46點，報23,210點，十一月期指低水幅度擴大到98點，收報23,112點，大市主要靠季度業績靚絕的內銀股支持，三大藍籌國有銀行合共貢獻恒指48點，換句話說，剔除內銀股，其實個市好明顯反彈乏力。

中行（03988）首三季純利792.44億元（人民幣．下同），較去年同期升27.7%，拆開第三季則賺272.22億元，比第一季及第二季的262.3億及257.9億元要高，也接近大行預測232.8億至272.95億元的上限，主要受惠債券減值回撥比預期高，信貸風險成本又比估計低。綜合大行預測中行全年賺987.2億元，現已達目標80.2%，相信業績預測及投資評級短期獲調升的好處，會在股價上反映多幾日。

中行啱價值投資者

以4.66港元股價計，中行一○年市盈率得9.3倍，預測息率有近4厘，無疑是四大行之中最平，長遠相當吸引的選擇，而且單是每年人民幣升值3至5%，已經唔止值咁平。

況且，估計一一年，最遲一二年中行業績可以突破1,200億元，市盈率得番7.6倍，對有點抗拒新能源、資源及內需等高估值股份的價值投資信徒來說，中行會是唔錯的長期持貨對象。

今年初唔少人炒「十二五」規劃概念股，新能源股威過一陣，可惜大部分捱唔到「十二五」出台，股價老早無戲唱。環保能源唔係唔好，但借海外成熟市場的經驗，要成為能源供應主流並唔容易，好似風力發電，風場已經受地理環境限制，要夠風之餘，也要有足夠地方放置發電風葉，同時間，要解決供電效益低、傳送損耗及電網配套等問題，現時，只佔全球電力供應總量2至3%，對比火電及核電，滲透率相去極遠。

毛利遠勝傳統火電

人類長期爭論，核電算唔算係潔淨能源，主要論點是廢料的處理及棄置染污。無論點，經濟效益極高的核電，在內地是快速成長，由「十一五」規劃的「適度發展」，到今日的「積極發展」，中國在未來十年，核電總裝機要達8,000萬千瓦，換句話說，年增長率達23%，筆者頗看好核電會接棒成為後「十二五」的炒作亮點。

東方電氣（01072）及哈動（01133）均見異動，不約而同，兩間都係近年積極發展核電設備設計及組裝的企業，筆者較偏愛東氣，其核電業務○九年才開始，佔總收入6.5%，今年上半年增至9%，估計明年全面反映，比重可進一步升至25%。

由於風電及核電的毛利遠高於傳統火電設備，帶動上半年東氣賺10.2億元，升近五成三，預期全年盈利21.8億元，明年再升26%至27.5億元，預期市盈率20.7倍，近日從高位回落一成，由歷史估值，35至37港元應可開始入市。