Fundman睇市：炒亞幣升值 一太買得過

天有不測之風雲，被捧為N年一遇的超級颱風鮎魚，在風和日麗的周末，同港人擦身而過。颱風外，上星期股市同樣出現一件雷聲大，雨點小的事情，人行周初突然加息四分一厘，剛剛才話中國年底前不會加息的人行行長周小川，好似畀人打兩巴掌一樣，加息曾經令市場憂慮中國九月份通脹數字失控，結果卻只係市場一早預期的3.6%，原來人行同颱風鮎魚，都只係同大家開個玩笑。

G20開會，人民幣中間價回順，重返兩周低位，升值預期有降溫迹象，展望未來兩星期，焦點應該係下月二、三號的聯儲局議息會議，會否一如預期，掟個5,000億美元的QE2（第二輪量化寬鬆）出嚟。俗語話一不離二，二不離三，近期全球無論股市、匯市（美元以外貨幣）、金市及其他商品市場，無不牛氣沖天，說穿了都係賭聯儲局主席伯南克，一個半星期後，會宣布再坐直升機掟銀紙落街，用水浸市場方式去振興美國經濟及疲弱的就業市場，唔怕一萬，至怕萬一，如果QE2無着落，整個金融市場九月初至今的方向，可能來個一百八十度轉向。

提防大市走勢逆轉

由八月底伯南克在懷俄明州Jackson Hole發表言論至今，美國經濟數據無大改善，出爾反爾機會其實唔大，反而值得擔心係QE2底牌出埋，「Buy on rumor sell on fact」（消息實現時出貨），金融市場隨時被淡友反擊，出現插水式逆轉，由股市投資者角度，伯蛇最好係有招而不發，講明經濟表現再轉弱，需要時才出手，並報出一個更大規模的買債計劃，等市場繼續「憧憬」落去。既然開大開細都不利，雖然大方向無變，但講真近期個市升咗唔少，有貨的，仲係趁未來幾日減一減磅比較上算。

港紙愈來愈唔值錢係事實，行過找換店，100蚊港紙換唔到85元人民幣，因為聯繫匯率，港紙要死跟全球最弱的美金，美金九月初至今經已貶值咗7.2%，透過買入人民幣收入為主的股票，係其中一個避免手上港紙貶值的方法，亞洲其他貨幣近期都愈升愈有，買一啲亞洲區企業，相信都會發揮到一定的效果。

這令筆者想到第一太平（00142），集團手上主要資產在菲律賓及印尼，菲律賓披索近兩個月升值4%左右，印尼盾無升咁多，大約2%，但都好過美金多多聲。

最近將Indofood旗下負責品牌消費品的ICBP分拆上市，加上1.3億美元的回購行動，刺激一太表現，九月初至今升23%。過去三年，一太盈利介乎2億至5.04億美元，貢獻主要來自印尼的Indofood及菲島長途電話公司PLDT，一太分別持有其50.1%及26.5%股權，市值分別為188億及240億元，較本身市值277億元，控股折讓大約三成五。

受惠亞洲經濟復甦

或許，除非控股有意全部套現，或實物分派，否則再大折讓都無用，但以股論股，受惠亞洲經濟全面復甦，Indofood及PLDT上半年業績都唔錯，分別升49.2%及9.9%，考慮埋亞洲貨幣升值持續，買一太，等於用折扣價買兩間亞洲企業（兩公司一○年預期市盈率17.4倍及12.1倍，都遠高於一太的8.3倍），都係除笨有精，筆者認為7元會係一個唔錯的中線入市價。