周潤發與劉嘉玲主演的《賭城風雲Ⅲ》，總票房超過10億港元，周潤發識英雄重英雄，讚對手周星馳及郭富城的賀歲片，性感亮相賀報捷的嘉玲，祝願三片能締造合共50億的票房紀錄，為香港爭光！

周潤發坦言對票房成績從來冇壓力，有贏有輸是過程！

劉嘉玲穿上Deep V花裙，性感飄逸！

劉嘉玲（左起）、周潤發、發嫂及劉偉強齊齊出席慶功宴。

周潤發與劉嘉玲主演的賀歲片《賭城風雲Ⅲ》，截至本月17日，內地票房收逾9億人民幣，港澳票房收達2千多萬元，總票房收入逾10億港元！電影公司昨晚在洲際酒店筵開30多席慶功，周潤發風騷現身，嘉玲則以Deep V花裙性感示人，當周潤發聽到傳媒邀請發嫂合照時，更發揮幽默本色：「發嫂呢Set造型整成日都係等呢下咋！」其後完成大合照又與嘉玲等走開，留下發嫂予傳媒影單人相，十分搞笑！

捧星仔城城場

風騷的周潤發被問到是否滿意票房，他說：「我從來冇壓力，聽劇組話多過上集，算有交代。（輸畀周星馳導演嘅《美人魚》美中不足？）冇所謂，我哋80年代拍好多賀歲片，有贏有輸係過程！星仔好耐冇出戲啦，啲人睇我都睇咗三年，會悶，我都會睇星仔套戲，睇吓佢轉成咩類型！（睇埋郭富城《西遊記之孫悟空三打白骨精》？）我未睇，但知票房賣得幾好，戲係點唔知，但上集我有份，今集有鞏俐同埋我鍾意嘅城城，所以會去睇！（拍《賭城風雲》第4集？）要睇王晶導演，我冇所謂。」

盼三片收50億

嘉玲則笑說：「我生氣！我小女人，我哋唔應該輸！（輸畀《美人魚》覺不值？）呢個咩問題嚟？我睇咗《美》片，都戥佢開心，內地市場真係大到不得了，我支持佢出多啲戲，我相信我哋三套戲加埋總票房會有50億，作為港人都開心！（有人發聲明為《賭Ⅲ》道歉？）每個人睇戲要求唔同，但我哋幾個可以再好啲！（拍第4集？）我要睇咗劇本先，起碼戲份要多！」

文：影視組