設計圖片及對白
喺網絡當道嘅世代，連一向予人感覺慢兩拍嘅政府，都要開始加入網上世界。其中由聶德權做處長嘅新聞處（ISD）由舊年底開始，都喺社交網站開設專頁「政府新聞網」，不時點評、甚至調侃時政，有啲政界中人似乎冇乜所謂，但聽聞有政黨被新聞處「玩」完之後，動真氣嬲咗，唔怪得建制派成日鬧啲官媒要做番官媒應有嘅角色喇。
舊年九月佔領中環行動提早引發，變成佔領行動，互聯網由於資訊流通，擔當重要作用。咁啱得咁蹺，ISD十月就更新專頁，搵咗幾名新聞主任（IO）同非公務員合約年輕員工，負責睇住新聞點子、製圖等工作。ISD都深知，要令網民鍾意睇，就要用最簡單嘅資訊，配以吸引圖片。
寸建仔橫額錯字
不過，新聞處中人話政府官僚始終都要經過程序，審批後先可以出，所以快極都有個譜，更重要嘅係，網民鍾意睇諷刺話題，但被諷刺對象會一笑置之，定係真心嬲咗，真係言人人殊。好似保安局前局長葉劉淑儀早前被黑客騙徒入侵電郵，騙取約五十萬元，ISD專頁就上載宣傳片，提醒市民「黑客匿埋暗角，密碼唔改唔得」，仲用假電郵標題「I need help. Urgent.」，明抽葉劉同「暗角」水。
葉劉係咪介意被「抽水」就不得而知，但聽聞發展局專頁改圖，玩建仔區議員祝賀聖誕橫額串錯「Merry Chrismax」同「Marry Christmas」，建仔中人就真係動咗真火，仲走去搵政府中人投訴，當局事後好似唔敢再咁玩喇！
其實，建仔自己出錯被玩，點解仲要怪人呢？好似立法會議員陳克勤嘅橫額都寫咗做「陳克群」，事後佢仲識得自嘲，呢啲咪襟撈囉！
第一手消息請下載on.cc東網
