內地污染水陸空 港人健康危危乎

靠山食山，靠水食水。香港背靠祖國，食乜呢？咪食正世界工廠源源不絕製造嘅污染食物囉。

「一個民族的命運，要看他們吃甚麼和怎樣吃。」如果呢句話真確無訛，咁炎黃子孫都係前途幾堪憂。內地奸商大量炮製嘅黑心食品風行全國，中國人食食埋埋咁多殺蟲劑毒臘肉、染色饅頭同瘦肉精豬肉，固然好人都食壞，變相慢性自我種族清洗，但其實除此之外，內地污染嚴重亦威脅緊十三億同胞嘅健康，唔使毒禍惡化，遲早又變東亞病夫。

嗱，太一叮唔係危言聳聽，內地專家分析指，長江流域由於沿河發展工業，每年排放嘅廢水污水多達三百億噸，真係唔飲死人都嚇死人，而沿岸嘅鯉魚同鯰魚就被驗出含有常見於洗潔精同洗衣劑嘅化學物質，食你唔死幫你清腸胃。世界工廠嘅主力發電機珠三角就更加唔使講，工廠日日直接排入下水道嘅有毒工業廢水不計其數。

農地嘅污染程度亦不遑多讓。呢，國家環保部門發現，珠三角部分城市有近四成農田菜地重金屬污染超標，廣東省供港菜場紛紛棄田北上，轉向雲南同山東等地發展。呢個現象反映咗乜嘢問題呢？珠三角土壤已經污染到不宜再種植農作物囉。

至於空氣方面咯喎，相信唔使太一叮多費唇舌咯，香港近年空氣混濁不堪，藍天不再，好大程度拜珠三角嘅工廠廢氣所賜，每年冬天吹北風季節，港人都感受特別深。

其實，覆巢之下無完卵，神州大地水陸空大污染，相隔一條大溝渠嘅香港又豈能獨善其身吖？除咗飽受空氣污染困擾，體質被持續侵蝕之外，進口食品安全問題亦陸續浮現。最近有學者從本港街市購入來自珠三角水域嘅鹹淡水魚，竟然全部樣本驗出含有致癌物二噁英。就連港人食水來源嘅東江，近年亦都屢被揭發有人將禽畜屍體同家庭排放物直接拋落河，水質飽受病菌威脅，港人健康變得毫無保障。

面對內地污染上天入地全方位侵襲，香港人都幾無奈，唔通七百萬人一齊移民咩？事到如今，市民唔敢寄望港府突然轉性英明神武，可以影響祖國嘅環保國策，但至少應該盡快落實粵港減排計劃，免令港人再日日吸塵。咁樣特區高官總算做番一件好事，唔單止幫到港人，仲可以拯救埋內地同胞，功德無量。叮！