港府民望又插水 咎由自取怨得誰

民調猶如晴雨表，有時真係好鬼準，尤其關於特區管治，何時晴空萬里，何時風雨飄搖，何時山雨欲來風滿樓，變幻莫測嘅政治形勢由客觀數據反映，一目了然，呃唔到人。呢，港大最新民調顯示，曾蔭權同港府民望又掉頭回落喇，市民對五大施政範疇嘅滿意率全線報跌，再次為港府管治敲響警鐘。叮！

財政司司長曾俊華二月發表「史上最廢」預算案，點燃民怨大火，港府民望應聲下挫，曾蔭權民望一度急滑至「肥佬」四十八點七分。其後，受惠於鬍鬚曾跪低派錢，兩者民望稍為回升。哈，點知唔夠一個月，派錢效應迅速消退，煲呔曾同港府嘅民望又重回跌軌，真係慘不忍睹。

民調結果顯示，煲呔曾嘅平均評分下跌一分至五十點二分，港府表現嘅滿意率更回落一個百分點至僅得兩成半。更不堪嘅係五大施政範疇表現滿意率全線下跌，當中以改善民生表現最差，逾五成人不滿，對維持經濟繁榮等不滿亦高於滿意。冰冷統計數據背後，折射出港人心裏愈燒愈猛嘅熊熊怒火。

眾怒難犯，到底港府又衰乜嘢，導致民望回落？民調喺三月十四至廿三號進行，咁就唔怪得喇！呢段時間發生咗唔少事，包括臨時撥款史無前例遭立法會否決，港府顏面無存，管治威信掃地；當局應變日本核危機，又被狠批粗疏混亂，敷衍塞責；跟住向新移民補派六千蚊，又設下嚴苛入息審查門檻，被社會炮轟搞「分化再分化」。民意昭昭，立竿見影，港府自取其辱，與人無尤，民望回落，何足為奇！

民調如鏡，太一叮好奇嘅係，中央政策組早前咪鬼鬼祟祟搞咗項民調，想知道鬍鬚曾應否下台嘅，唔知結果係點呢？若然證實佢已成神枱貓屎，神憎鬼厭，唔該中策組盡早告知鬍鬚曾執定包袱，唔好再拖喇。

不過，話分兩頭，鬍鬚曾成為港府民望負資產乃不爭事實，但計太一叮話齋，港府民望插水，唔係一個半個高官累事喎，而係整個港府都有問題。正所謂：心態決定狀態，思路決定出路。夕陽政府等收工，上至特首，下至副局政助，人人抱住得過且過、唔做唔錯嘅心態捱日子，猶如一具具無靈魂嘅行屍走肉，只等任期一到就返歸瞓覺，如斯境況，政府施政怎有狀態可言？香港又怎有出路？政府不得民心，民望拾級而下，乃必然結果，最慘係官僚禍港，市民當殃咋。叮！