隔山買車又一鑊 浪費公帑鑊鑊新

日本大地震引發核輻射洩漏，應急機制失靈，演變成威脅全球嘅核災難。所以話，處理突發事件唔係講玩，有備至可以無患，任何疏忽大意都可能導致嚴重後果o架。

係人都知，如果隧道或附近範圍發生突發事件，應該第一時間拖走出事車輛，防止大塞車令交通癱瘓，甚至連緊急車輛都受影響，分分鐘搞出人命o架。不過，弊就弊在官僚辦事得過且過，人哋隔山買牛，佢哋就隔山買車，購入嘅拖車貨不對辦，得物無所用，萬一隧道入面爆大鑊，都唔知點算。

話說運輸署買咗十架負責處理突發事件嘅隧道拖車，總值二千二百幾萬元，合約寫明舊年十月前交車，點知承辦商足足拖咗五個月至交貨。更離譜嘅係，機電署驗收嗰陣至發現拖車「周身唔妥」，包括吊臂設計唔啱、前軸負荷過重等。

呢批拖車主要用於通往機場嘅青馬管制區主要幹道，有前線員工質疑驗收敷衍求其，因為擔心安全，冇人夠膽用新車，管制區救援工作隨時受影響。話時話吖，前軸負荷過重後果可大可小，萬一發生斷裂，翻車都有可能，到時就大鑊喇，拖車救唔到人不特止，仲要等人哋嚟打救，運輸署買啲咁嘅車番嚟添煩添亂，你話係咪靠害吖。

當局話，冇評估幾時正式收車，但呢批車有廿四個月保養期，期間承辦商會負責修復瑕疵喎。喂，家陣唔係保養期有幾長、邊個負責搞番掂咁簡單噃，萬一有大件事發生，到時拖車唔夠用延誤咗救援，呢隻鑊邊個孭先？

查實，政府部門隔山買車搞到貨不對辦呢啲瘀嘢，都唔係第一次嘅啦。消防處舊年大拿拿使咗七千幾萬元，購入十七架法國製油壓升降台消防車，結果車運到香港至發現問題多多，射水冇力，有啲甚至爆喉添，卒之成批消防車要停用。

呢次運輸署仲離譜，有隧道員工狠批署方，訂車從來冇諮詢過前線員工意見，私人公司嘅小型拖車可以拖中型車輛，而政府買番嚟嘅中型拖車只能夠拖中型或小型汽車，根本係浪費公帑。不過，運輸署就繼續死撐，話冇收過工會對車輛設計嘅意見喎。

運輸署唔止隔山買車，仲閉門訂車，結果搞出個大頭佛，有立法會議員要求嚴正處理事件，除咗仔細驗收後至收車，更應向承辦商追討損失。計太一叮話齋，承辦商貨不對辦固然要追究，而運輸署署長黎以德做嘢求求其其，得過且過，更加要被問責喇。叮！