服務差又加價 港鐵為富不仁

錢銀用之得當係福，用之不當係禍；取之有道係義，取之無道係惡。港鐵係全球極少數年年賺大錢嘅鐵路營運商之一，但見利忘義，服務質素並冇因為水頭足而不斷提高，反而愈來愈差，正一係用之不當，取之無道。

有政黨嘅調查發現，市民對港鐵最反感嘅係貪得無厭，搏命掠水。有七成八受訪者反對港鐵今年六月按可加可減機制加價；超過六成人認為港鐵車費水平偏貴；覺得合理嘅只有兩成六；三成半受訪者話，近年連串事故已經影響咗自己對鐵路安全嘅信心。

政黨話港鐵近排延誤事故不斷，當局應該設立「事故扣分制」，港鐵事故愈多，票價加幅就應該愈低，以彌補事故對乘客嘅影響。

講開港鐵事故，淨係頻密程度已經嚇死你。最近個幾月，港鐵已經先後發生六宗嚴重事故，列車服務受阻最嚴重嘅足足有四粒鐘。前幾日一列東鐵線北行列車喺羅湖站附近因供電系統故障跪低，數以萬計市民受影響，仲連累到深圳羅湖口岸要緊急封關，丟晒香港架。

事故頻生，但高層闊佬懶理，改善設施拖得就拖。早排港鐵向立法會交代今年頭兩個月三宗路軌斷裂事故調查報告，其中一月中東鐵線近火炭站事故起因，就係維修唔及時，事故發生前八日已發現鋼螺栓折斷咗，但港鐵只裝上直徑較細嘅鋼螺栓頂檔，點知更換工程未開波，路軌已經斷裂。

同樣離譜嘅係，港鐵早已經發現成個鐵路網絡仲有八處路軌用緊臨時鋼螺栓頂檔，但好遲至全部改用標準零件，相關維修指引更拖到近排至發出，簡直係草菅人命。連一向對港鐵不監不管嘅運輸及房屋局，亦首次向行政總裁周松崗發出通知，要求港鐵吸取教訓。

叮！港鐵吸金就叻，吸取教訓？好難咯！舊年港鐵狂賺一百二十幾億，按年增長兩成半。近幾個月本港通脹愈來愈犀利，交通費開支激增已引起民怨，但港府作為大股東嘅港鐵，不但冇體恤民困，反而帶頭加價。高層一早就話，會按可加可減機制喺六月調整票價。

計太一叮話齋，港鐵為富不仁，社會責任得個噏字，高通脹之下仲搏命加價，根本係趁火打劫。食相咁難睇，唔怪得成日畀人鬧無情無義啦。叮！