積金局擺明搵笨 低薪族百上加斤

官僚做嘢唔經大腦，好事變成壞事嘅例子多不勝數，話口未完又嚟多劑。呢次仲弊，中招嘅係收入最奀嘅低薪一族，又畀人剝奪咗原有福利。

呢，強積金計劃管理局建議將強積金供款入息下限調高至五千五百元，話估計有八萬幾打工仔同自僱人士可獲豁免供款，入息上限就會分階段逐步調高。積金局又話咁做係因為僱員每月就業收入中位數上升咗。

調高強積金入息下限等更多人獲豁免供款，好事嚟噃。不過咪咁快開心住，如果以為低薪打工仔真係有着數，咁就大錯特錯咯。係人都知，最低工資今年五月開始實施，按照每個打工仔每月做二十六日、每日八個鐘計，月入係五千八百幾蚊，早已超出積金局建議嘅入息下限，享受唔到「優惠」，所謂修訂根本就係數字遊戲，擺明搵笨。

有立法會議員直斥政府官僚，制訂政策未有互相配合。亦有勞工界議員指最低工資實施後，變相令所有全職打工仔都要供款，下限形同虛設，只適合兼職人士，認為下限應該提高到六千五百蚊至恰當。

積金局唔肯認衰，話最低工資以時薪計算，而強積金供款以月薪計算，加上本港冇實施標準工時，制訂供款入息下限標準有一定困難，只能交畀政府決定。

叮！咁即係話，積金局嘅「修訂」只係例行公事，唔係為打工仔着想，更冇諗過會為低薪打工仔帶來新問題。最低工資得廿八蚊，正一買糖唔甜買鹽唔鹹，當局應該將入息下限調高到更多打工仔受惠嘅水平，而唔係自欺欺人，搞到唔湯唔水，令低薪打工仔生活百上加斤，咁嘅修訂仲有乜意義？

其實，對打工一族嚟講，強積金早就失去意義啦，既無法保障部分人士嘅退休生活，回報有限、風險無限同樣為人詬病。而最大嘅問題係管理費貴、透明度低，基層人士個個月辛辛苦苦供款，等於變相為基金經理打工。

強積金形同虛設，市民一直要求政府推出全民退休保障計劃，但當局好似借咗聾耳陳隻耳咁，睬你都多餘。查實，好多地方一早已經有呢類保障計劃，遠嘅唔講，澳門打工仔每月係咁意供幾十蚊，六十五歲之後每月可以領取一千七百蚊養老金；新加坡仲巴閉，公積金由政府統一管理，唔止免稅，仲設定保證回報率，唔夠由政府包底，市民無後顧之憂。

計太一叮話齋，香港打工仔每月供強積金，臨老唔過得世，仲要自己顧自己，同人唔同命，真係羞家咯。叮！