酒牌局倡設煙房 周一嶽被摑一巴

潮流興禁煙，食衞局局長周一嶽以鐵腕手法搞到煙民冇啖好食，今年嘅財政預算案仲踩多一腳，勁加煙稅四成，誓要趕絕煙民咁話。但估唔到嘅係，由曾蔭權委任嘅酒牌局居然公開唱反調，建議當局容許售酒處所例如酒吧等加設吸煙房，避免顧客喺店外吸煙滋擾居民喎。

叮！呢啲咪叫各自為政囉。港府大鑼大鼓禁煙，酒牌局卻建議設吸煙房，咁搞法，點只唱反調咁簡單，直頭係當眾摑咗周一嶽一巴喇，你話係咪好笑吖！

聽吓港府點回應。食衞局話喎，已留意到禁煙後較多吸煙者喺室外吸煙，但未有任何證據證明吸煙房可以有效分隔吸煙者與非吸煙者，吸煙房非切實可行，若要減低市民接觸二手煙，協助吸煙者戒煙及防止青少年染上煙癮，先至係最有效方法。叮，簡直係廢話中嘅廢話，講咗等於冇講！

其實，當年港府實行室內全面禁煙時，酒吧業界就提議設立吸煙房，但被當局一口拒絕，逼到食肆及酒吧嘅煙民走到室外圍住垃圾桶「打邊爐」，產生唔少噪音同衞生問題，對居民造成嚴重滋擾。家陣酒牌局重彈舊調，無非係想補鑊啫。可惜吖，正如業界人士話齋，自從室內全面禁煙後，已有一成酒吧執笠，依家仲糾纏於吸煙房問題已經冇意義咯。

講開又講，禁煙唔係唔啱，係人都知道吸煙危害健康喇，不過咁，禁煙應該多管齊下，既要有法例配合，亦要有行政措施，更加要宣傳教育，咁先至可以達到事半功倍嘅效果㗎。反觀港府，禁煙禁到唔湯唔水，添煩添亂，怨聲載道，不知所謂。更令人反感嘅係，當局不斷提高煙稅，話就話為市民健康着想，唔係為增加庫房收入，其實完全係呃鬼食豆腐。正如有人質疑，既然港府咁為市民健康着想，點解禁煙唔禁賣呢？

講到尾，港府禁煙唔禁賣，根本就係唔捨得每年數以億元計嘅煙稅。有人形容港府禁煙虛偽，真係一啲都冇講錯。正因為禁煙虛偽，所以話之你效果如何，話之你會唔會擾民。呢，上年加咗煙稅之後，煙民人數唔單止冇下降，仲上升咗添，真係匪夷所思。

周一嶽，唔好玩啦！如果有心禁煙就做得徹底啲，唔止禁食，而且禁賣，你夠唔夠膽試吖？如果唔係真心禁煙，咁就無謂整色整水擾民嘞。叮！