忍看稚童成新鬼 豈容庸官縱疫魔

人生在世，有乜嘢比失去親生兒女更悲呢？若果呢種事發生喺新春佳節，就更觸景傷情。尋日大年初五，北角有個七歲女童晨早喺屋企暈低，送院後不治。佢嘅父母哭成淚人，仲話個女死後雙眼仲睜開，要求入病房幫佢合番埋。咁嘅說話，就算係鐵石心腸嘅人聽咗都心酸，真係可憐天下父母心！

呢個女童係長期病患者，據醫生講，可能係肌肉或者大腦系統有問題，呼吸比普通人困難，如果染咗流感，病情就會特別嚴重，抽筋發燒，又屙又嘔。佢既係幼童又係長期病患者，屬於高危人士，本來早就要注射流感疫苗，如果打咗講唔埋有得醫。你話幾唔抵呀！

衞生防護中心事後諸葛亮，話打流感針可以有效預防流感，高危病人應該盡快打針，以保障健康咁話。邊個唔知阿媽係女人！政府用幾億公帑買流感疫苗，又唔及早安排市民尤其係高危人士注射，家陣先至叫市民去打針，遲唔遲啲呀？唔係屈佢哋㗎，衞生防護中心嘅數字顯示，直至尋日為止，全港只有三十幾萬人打咗流感針。

上述女童只係呢波流感疫情嘅犧牲者之一。近排疫魔襲港，來勢洶洶，醫管局話，大年初一到初四全港十五間公立醫院急症室有二萬七千幾人求診，平均每日有六千七百人，比舊年同期增加三成。更弊嘅係，呢幾日已接到多宗流感院舍爆發嘅報告，分分鐘會全港大規模爆發。

講到防治傳染病，食衞局局長周一嶽等衞生部門高官不嬲慢幾拍，以人手安排為例，公立醫院醫護人手本來就緊張，家陣工作量大增，加上豬流感、寒流、長假期三面夾擊，醫護人員做到合合，政府都冇任何應急措施。

其實，公立醫院醫護人手短缺都唔係今日先開始，呢幾年本報曾多次報道醫護大逃亡嘅消息，警告政府如果唔盡快增加人手，後果不堪設想。可惜周一嶽等人借咗聾耳陳隻耳，呢，家陣就大鑊嘞！叮！

唉，每年流感高峰期，班高官都例牌後知後覺，疫情殺到就手忙腳亂，疫情過後就乜都唔記得，然後第二年又係後知後覺，然後又手忙腳亂，睇怕今次都好難走出呢個怪圈。

被流感殺死嘅病人係唔會翻生嘅，上述七歲女童嚟到人世短短幾年，連世界係點樣都未睇清楚就匆匆離去。好心周一嶽等庸官唔好繼續草菅人命啦。叮！