政府帶頭賴死 還港於民齋噏

維多利亞港係香港最珍貴嘅天然財富，維港兩岸嘅璀璨夜景，更令香港獲得東方之珠嘅美名。喺岸邊觀賞來往船隻係人生一大享受，難怪年年都有咁多遊客慕名而來。可惜好景不常，維港海濱近年變得七國咁亂，到處都係臨時停車場。難怪有市民疾呼：還我維港！

民意不可侮，政府死死氣應承還港於民。點還法呀？就係將岸邊嘅政府及私人設施搬走，然後起海濱長廊。仲以為維港會重現昔日輝煌添，點知至今仲係得個噏字。

因乜事搞成咁嘅呢？咪就係政府其身不正帶壞頭囉。唔講真係唔知，原來政府先至係侵佔維港美景嘅罪魁禍首，政府共有十五幅臨近海濱嘅土地，以短期租約形式出租做停車場，其中包括擁有無敵海景嘅前北角邨地王，面積成十萬平方米咁多。呢啲停車場唔搬走，海濱長廊就冇辦法興建。

照理講，既然係短期租約，要搬都唔係咁難啫，租約到期唔再續咪得囉。如果你真係咁諗，就太傻太天真嘞，係人都知道，政府要人哋搬遷話都冇咁易，但係要政府設施搬遷，就冇咁順攤嘞。早幾年有政府部門佔用維園空地做維修倉庫，拖咗不知幾耐先至肯搬走。

今次亦一樣，運輸署硬係唔肯搬，仲講咗一大堆歪理為自己辯護。佢哋話喎，停車場使用率高，供貨車同旅遊巴泊車位又短缺，如果家陣終止合約，就會令違例泊車問題惡化，貨車因為搵唔到位泊，就要不斷喺馬路行，增加道路污染。總之，如果終止合約交番幅地出嚟，就會天下大亂，出咗事邊個孭呀？運輸署實牙實齒話，搵唔到合適地方就唔搬。吹咩！

大佬呀，叫你哋搬遷停車場啫，你哋連違例泊車、道路污染都入埋呢筆數，過唔過分啲呀？唔怪之得有區議員炮轟政府得個講字，根本無誠意還港於民。「政府碼頭話唔搬得，家陣連短期租約停車場都話唔搬得，咁點先可以騰空海濱畀市民享用呀？」

其實，如果有心搬遷，絕對唔會搵唔到地方，比如中西區區議會曾建議，利用行人天橋下面嘅位置做泊車位，但係運輸署聽唔入耳。講到底，佢哋係嫌麻煩，根本唔想搬。政府帶壞頭，私人業主梗係有樣學樣啦，咁搞法，海濱長廊都唔知何年何月先至起得好。

無論幾好嘅天然財富落喺呢班庸官手上，都會被佢哋糟質到唔似樣，話佢哋唔係敗家仔，邊個信吖。叮！