包庇彩報大開花 禍害甚於茉莉花

今時今日，內地唔少官員患咗茉莉花恐懼症，幾乎一聽見個「花」字就怕得要死，周身唔舒服。但奇怪嘅係，對於「六合花」呢樣嘢，佢哋居然視而不見，若無其事，講都冇人信。

乜嘢係六合花？咪即係遍地開花、荼毒神州嘅非法六合彩報囉。唔係嚇你，六合彩報嘅破壞力絕對大過茉莉花，如果話茉莉花可以攪亂社會，破壞和諧，咁六合彩報直頭可以令人傾家蕩產，禍國殃民呀！

要舉呢啲例子，三日三夜都講唔完。呢，早排深圳寶安區有位女官員因沉迷賭地下六合彩，輸錢後經常問人借錢，更以賣官為名四處招搖撞騙，結果事敗被通緝，唔只斷送大好前程，仲要面對牢獄之災。官員尚且成為彩禍嘅受害者，平民百姓被害到家破人亡嘅悲劇更加無日無之喇。

叮，六合彩報煽動賭風，荼毒神州，確實害人不淺。就講重災區深圳吖，寶安有市場居然出現「六合彩報走廊」，商販公然出售非法走私入境嘅港產彩報以及各種內地彩報，有人甚至接受即場落注，簡直肆無忌憚，目無王法。奇就奇在，對呢啲非法行為，市場管理處闊佬懶理，政府部門亦從來冇採取執法行動，當地居民怒斥當局放縱港產彩報害人，質疑事件背後涉及貪腐及包庇，真係一啲都冇鬧錯。

話時話，有人長期將港產六合彩報走私北上，然後周圍公開擺賣，做到好似攞正牌咁，如果話背後冇人包庇，細路仔都唔信啦。本報記者放蛇所見，深圳呢個市場布滿售賣非法六合彩報嘅商販，淨係二樓一個角落就有十幾檔，售賣嘅非法六合彩刊物應有盡有，包括港產六合彩報《六合皇》及《創富》。前港區全國人大代表朱幼麟反映，其實唔止深圳市場公開販賣非法六合彩報，廣州亦有類似嘅「彩報廊」。

城大學者宋立功就講得啱嘞，內地售賣非法六合彩報嘅情形愈嚟愈嚴重，發展到依家直頭係大搖大擺咁賣，當地警方實在難辭其咎，除咗要檢討係咪有人幕後包庇，更重要嘅係要斬草除根，徹底摧毀彩報嘅生產線。

係囉，正所謂擒賊先擒王，要打擊非法六合彩報，杜絕賭風，首先就要揪出幕後主腦。可惜，你有你講，兩地政府一於少理，內地當局固然百般縱容，香港方面亦係隻眼開隻眼閉。早排有立法會議員提出質詢，當局先至透露舊年一月至十月，海關處理咗兩宗有關走私六合彩報嘅個案。叮，走私六合彩報就算唔係日日發生，一個禮拜起碼都有幾次喇，當局十個月先至查處兩單咁大把，擺明就係失職甚至包庇喇！

最離譜嘅係，舊年六月本報揭發三份港產六合彩報《創富》、《六合皇》及《貼士皇》違規更改承印人資料，涉嫌違反《本地報刊註冊條例》，但警方居然淨係控告三報嘅出版人，而放生當時由淫賤黎擔任董事嘅承印人公司。嗱，當局一制兩法，告一間唔告一間，捉小放大，淫賤黎自然變本加厲，有恃無恐喇。

計太一叮話齋，六合彩賭禍不斷蔓延，已經瀕臨失控，內地當局淨係識得防範茉莉花，但就放任彩禍遍地開花，根本就係自毀長城，隨時亡國亡黨都有之！