港官無力助學童 讀書成本斷擔挑

加風刮入校園勢不可擋，早兩日先至因為教科書大幅加價搞到怨聲載道，依家又輪到校服加價五成，家長苦不堪言。

每年呢個時候，校服都例牌加價，家長早就無可奈何，慘就慘在今年特別勢兇夾狼。

往年加極都係十零個巴仙，但係今年一加就加咗五成咁多，唔驚就假嘞。即使有錢都唔一定買得到新校服㗎，事關部分校服製造商擔心成本繼續上漲根本唔肯接定單。

眾所周知，校服嘅主要原材料係棉花，而舊年全球棉花大失收，物以罕為貴，棉價好似坐火箭咁勁升，幾個月就升咗成一倍，校服商擔心校服價格追唔上原材料升幅，惟有拿拿臨「封盤」謝客。

校服價格狂飆玩殘家長，尤其係一家有幾個細路讀書嘅貧困家庭，要攞多千幾兩千蚊出嚟買校服，除咗節衣縮食別無他法。難怪日前有學生家長去政府總部請願，要求正視校服價格嘅問題。

話時話，今時今日養兒育女、供書教學真係唔容易，因為加價嘅絕對唔淨止教科書同校服。嗱，最低工資五月一日就要實施，部分學校已經喺度打學生嘅主意，話要增收學生雜費同堂費，以彌補增加咗嘅開支。呢度加一啲，嗰度加一啲，加加埋埋就係一大筆，叫嗰啲低收入家庭點頂呀！

其實讀書費用飆升嘅唔止香港一個地方，不過其他地區嘅政府就會想盡辦法幫學生家長解困，好似美國好多州都用公帑向學生提供免費教科書。可惜香港人運滯，碰到個涼薄政府，惟有自認倒霉。睇吓嗰份史上最廢財政預算案咪知囉，加加埋埋都唔夠三句話係針對貧窮學生嘅。

政府唔單止幫唔到家長，仲要添煩添亂。要求書商分拆教材就係最活生生嘅例子，如果政府有牙力促使書商就範就話有減價空間啫，可惜書商當教育局冇到，單方面反枱話要加價，咁就大鑊。

讀書成本重到斷擔挑，直情嚇窒家長，唔怪之得好多香港人都唔生仔啦，佢哋唔係唔想生，而係唔敢生，難為煲呔曾仲要求每對夫婦生三個細路添。睇嚟，港府都唔好阻止內地孕婦來港生產咯，否則，本港中小學分分鐘要進一步殺校縮班。叮！