高官難敵病魔 港府如何收科

中國人相信命運與風水，有時都咪話唔信邪。夕陽政府百事哀，商務及經濟發展局局長劉吳惠蘭突然因病呈辭，曾班子又失一員，令本已五勞七傷嘅跛腳鴨政府更加殘弱不堪，風雨飄搖嘅管治無異於雪上加霜。唉，呢個政府究竟捱唔捱到明年任期結束，真係好成疑問。

劉吳惠蘭上月中突然入院，外界盛傳佢患上腸癌，當局一直秘而不宣。直至尋日，劉太終於發表聲明，證實已接受外科手術，成功切除結腸腫瘤，仲以需要時間跟進治療同調理身體為由，辭任局長職務。

正所謂，天有不測風雲，人有旦夕禍福，生老病死係每個人必經階段，冇人可以控制，所以劉太因病辭職，都可以理解嘅。問題係，高官病完一個又一個，港府都幾頭痛㗎。煲呔曾死雞撐飯蓋，話劉吳惠蘭辭職對局方工作唔會有負面影響喎。嗱，呢啲咪叫夜行人吹口哨，自我壯膽囉，堂堂局長離任，成個政策局頓時群龍無首，咁都話無影響，細路哥都唔信啦。

不過咁，太一叮都好明白煲呔曾點解要擘大眼講大話，港府人才凋零，劉吳惠蘭一去，搵邊個接任執手尾，真係有排煩。大家都知啦，港府民望低落，施政亂象叢生，好多資深政務官紛紛跳船逃生，唔係轉投私營機構搵真銀，就係轉去公營機構養老，擺得上枱嘅局長人才，真係買少見少。本來呢，局長出事，由副局長蘇錦樑接手都好順理成章，可惜吖，蘇副局兩年前爆出「卡片醜聞」，民望一沉不起，加上佢辦事能力備受質疑，雖然話煲呔曾一向任人唯親，無視民意啫，但都無理由蠢到捉隻老鼠入米缸啩。

其實，最令煲呔曾頭痕嘅唔係劉吳惠蘭接任人選問題，而係成個政府五勞七傷，風雨飄搖。呢，短短一個月之嘛，已經有多位高官相繼入廠大修，除劉吳惠蘭之外，中策組首席顧問劉兆佳傳因泌尿系統患病入院開刀做手術，跟住政制及內地事務局局長林瑞麟又啱啱做完通波仔手術；加埋今年初進行小腸氣手術嘅教育局局長孫明揚，同埋前年因心絞痛緊急入院做通波仔手術嘅財政司司長曾俊華，嘩，五隻手指幾乎唔夠數。正如有人話齋，唔通港府勢弱，高官成日擔驚受怕，搞到惶惶不可終日，所以嚇到病？或者真係好似有人所講，下亞厘畢道風水欠佳，港府氣數已盡？

中國古代有天人感應之說，德興國興，德喪國亡，今時今日嘅港府黑氣纏身，高官遭殃，唔知當中有乜啟示呢？太一叮好奇嘅係，一向迷信風水嘅天主教徒煲呔曾，唔知有冇再次請教師父，幫禮賓府擺局改運呢？講開風水，政府總部就快搬去新大樓，嗰度就算風水布局再好，都未必可以抵擋得住沖天嘅民怨。一句講晒，福禍無門，唯人自招，如果港府唔順應民意，改善施政，遲早輪到有人腳痛嘅咋！叮！