公院醫生太疲累 病人命仔凍過水

慘！慘！慘！公院醫生實在慘！一日做足十幾個鐘，除咗食飯瞓覺就係開工。如果唔係着住件白袍，慘狀同內地當年獲救嘅山西「黑窰工」睇怕冇乜分別。

有立法會議員同前線醫生組織訪問咗七百幾位公立醫院醫生，發現佢哋每周平均工作六十五個鐘，一成二每周工時超過八十個鐘，百分之三更超過一百個鐘。

嘩！就算成個禮拜唔放假，平均每日至少要做十四個鐘，數下手指都知呢條數攞命啦。難怪有九成二醫生希望醫管局即時執行標準工時咯。有八成六受訪醫生話，如果工作環境繼續冇改善，可能會考慮劈炮唔撈。

叮！忙得咁交關，精力同體力都超晒負荷，醫生頂唔順唔在講，病人入醫院隨時搵命博。調查發現，近八成醫生曾因為過勞影響臨床判斷，約四成更因此搞出醫療事故，最常見嘅除咗斷錯症同開錯藥，仲有做手術嗰陣分唔清落刀位置。唔怪得公立醫院周不時出現輸錯血、割錯器官之類嘅「杏林奇譚」啦。咁搞法，病人命仔認真凍過水。

食物及衞生局局長周一嶽尋日回應話，唔希望醫生離開，要避免醫生工作量影響服務質素，又話好多專科醫生須長期照顧病人，因為如果涉及病人需要，好難界定工時喎。

叮！即係點吖？又想卸膊？上次公院前線醫生不滿工時過長群起抗爭，周一嶽唔正視問題存在，反而倒打一耙玩抹黑，指摘醫生唔應該「斤斤計較」，結果醫生群情洶湧，齊齊要求「周斤斤」順應民意「下台回家」，周一嶽卒之要認衰道歉。

冇錯，醫護工作以病人利益為先，正因為咁，醫管局對解決醫生荒更加責無旁貸。家陣門診醫生每個病人只有三分鐘診症，住院部醫生兩個鐘內要巡視二十九個病人，唔通呢啲就叫以病人利益為先？

再講，喺醫管局「奴工」制度下，前線醫生長期超時工作，捱到收工幾乎連自己都要入埋急症室，醫療服務質素毫無保障，呢啲又係咪以病人利益為先？

當局對公立醫院醫護人手流失束手無策，其實唔係冇嘢可做，而係唔想做嘢。醫管局成立廿年，醫療撥款年年增加，但人手年年短缺，服務質素年年下降，係因為官僚架構「超磅」呢個無底洞，令資源錯配嘅狀況無法改變。

計太一叮話齋，公院醫生逃亡潮有排都未完，如果唔針對資源錯配呢個頑疾開一刀，醫生遲早走清光。到時班高官有乜唔妥要「通波仔」，對唔住，自己畀錢搵私家醫生搞掂啦。叮！