酒店不足變趕客 旅業旺丁唔旺財

五一長假期又到喇，又係旅遊業嘅黃金機會。旅發局主席田北俊預計，節日期間會有二十八萬內地旅客訪港，比舊年同期增加一成半；至於全年咯喎，訪港旅客預料可以突破四千萬人次添，再創歷史新高，真係聽落都開心。

有朋自遠方來，不亦樂乎。香港客似雲來，當然係好事喇，不過咁，田少似乎有少少擔心噃，究竟佢擔心乜嘢呢？佢話，隨着旅客不斷增加，酒店房間數目追唔上，導致價格波動，如果當局仲唔快啲諗辦法解決，勢必影響旅遊業發展。

其實，酒店房間不足唔係今時今日先至出現，而係老問題喇。講出嚟真係失禮死人，香港話就話係國際都市，但酒店房間加加埋埋只有六萬間咁大把，搞到每逢旅遊旺季都人滿為患，於是乎，有啲酒店就乘機坐地起價，酒店租金好似海鮮價咁，嚇到好多旅客寧願轉去澳門、深圳及珠海住宿。你話喇，咁同趕客有咩分別吖？

係人都知，訪港旅客人數屢創新高固然係好事，但最緊要係旅客肯購物消費。有統計顯示，喺本港過夜嘅內地旅客，每次平均消費七千四百幾蚊，遠遠高於唔過夜嘅旅客。家陣酒店房間唔夠，好多旅客唔喺香港過夜，消費少咗一大橛，旺丁唔旺財，簡直係倒自己米。

旅遊業不嬲係香港經濟支柱之一，港府成日話要將香港打造成亞洲旅遊樞紐，點知到頭來又係大隻講。好簡單，發展旅遊業一定要有完善嘅規劃及配套設施，其中酒店更加係必不可少，當局對酒店房間不足一直視若無睹，眼白白睇住客源流失，咁又點樣發展旅遊業吖！

唔怕唔識貨，最怕貨比貨，廣州、深圳、澳門等鄰近城市，近年新酒店成行成市。甚至連二線城市亦搏命發展酒店業，例如佛山就計劃幾年內建十九間五星級酒店，問你怕未。

講開旅遊業，唔能夠唔提監管。由於本港旅遊業長期由業界自己人管自己人，搞到醜聞多多，臭名遠播，港府一直闊佬懶理，直至前日先至推出改革方案展開諮詢。問題係，諮詢完仲要總結、仲要立法，起碼要搞幾年先至可以正式實施，等到嚟蛇都死啦。叮！

一萬年太久，只爭朝夕。咪話太一叮唔提醒，海南島正全力發展旅遊業，而且仲推出離島購物退稅添，如果港府繼續唔嗲唔吊，唔好話打造乜嘢亞洲旅遊樞紐，呢條經濟支柱仲保唔保得住都成問題吖！