政情：金刀梁慶生年年20歲
香港愛滋病基金會尋日慶祝創立二十周年紀念兼義工嘉許禮，由主席「金刀梁」梁智鴻做頒獎嘉賓兼上台為基金會切生日蛋糕。司儀喺呢個時候就踢爆金刀梁都喺今個月生日，仲叫全場嘉賓唱首生日歌畀佢聽，氹得佢鬼咁開心，仲話：「我今年二十歲生日！」引嚟哄堂大笑，查實佢係七十三歲生日。金刀梁事後話基金會每年周年紀念都會「順便」幫佢慶生，所以唔覺得驚喜喎。
佢喺活動中嘉許啲服務咗基金會好耐嘅義工，但原來佢都加入咗基金會二十年，結果佢都有份獲頒二十年長期服務獎。咁就叫做喜上加喜啦！
金刀梁（左）同愛滋病基金會顧問委員會委員林貝聿嘉一齊切蛋糕，慶祝基金會創立二十周年，「順便」慶祝埋自己七十三歲生日。