政情：搞搞政：何鍾泰驗身排公院

政府高官近日頻頻入院，商務及經濟發展局局長劉吳惠蘭尋日仲突然因病辭職，搞到政圈人心惶惶，唔知下一個會輪到邊個呢？驗身風席捲政壇，唔少立法會議員都話，政圈應酬多，壓力又大，所以年年都會驗身。如果大家以為尊貴嘅議員會使用尊貴嘅驗身服務，咁就大錯特錯嘞，好似立法會工程界議員何鍾泰咁，佢話從來都係使用公立醫院嘅驗身服務，就算排期排得耐都冇問題喎！

今年七十二歲嘅何鍾泰身體一向壯健，原來係打理有道，佢話由頭到腳都會定期驗身，包括心臟、肺部、肝纖維、大小腸等等，仲教路話驗身唔使一次過驗晒，可以學佢咁，分批嚟驗，就算公立醫院排期排得耐，每年都總會排到其中一樣，亦唔驚照太多X光會有感染輻射嘅後遺症。佢仲話工作就係最佳嘅減壓良方，所以從來都唔覺得議會工作會為佢帶嚟壓力。

老實講，佢都算係上等人，而議員又有醫療津貼，當然畀得起錢睇私家醫生，估唔到佢竟然去公院排期，咁係咪同啲基層市民爭位呢？