Fundman睇市：IGG強勢有理由

美國二月份非農職位增加29.5萬，遠高於市場估計的24萬，失業率再創海嘯後新低，由5.7%降至5.5%，聯儲局嚟緊六月加息的憂慮，一下子又殺埋身，利率期貨反映估九月加息的機會率升至六成三，而在本月十七、十八日的FOMC會議前，加息預期難免繼續影響美股氣氛。上周五數據一出，美股三大指數由頭跌到尾，道指跌278點，收17,856點，美國十年債息急抽0.13厘去到2.24厘，由預託證券顯示，今日港股可能開23,900點樓下。

去年十一月至今，人行兩次減息一次降準，對中港股市的震撼程度，可以見到是愈來愈低，美銀美林中國策略師David Cui向來口淡淡，出報告話每次放水都係掟貨時機，認為人民銀行貨幣政策轉向，經已來得太遲（behind the curve），對推動經濟恢復幫助唔大，理由係包括內地實質利率仍然高企，減息對樓民的負擔幫助有限，新買家怯於供過於求，對樓價向下預期已經形成，即使A股急升，今次得益的只有少數內幕人士，對社會財富效應刺激作用唔大，認為要救到中國經濟，目下僅得弱勢匯價一條路可以行得通。

市場乏炒作題材

不過，在上周的兩會上，有政協引述總理李克強的發言，話總理唔認同推行寬鬆貨幣政策，中國會堅持穩定貨幣政策。只不過，今時今日股市對央行印銀錢都有如着了迷一樣，中國唔加入貨幣戰，無論係咪總理心底果句都好，短期確係相當趕客也。

兩會期間，中央經濟報告預測今年全年經濟增長7%，比一四年的7.4%更低。實體經濟動力不足，出口及就業唔多掂，而貨幣政策轉向，對內銀股推動又早在去年第四季充分反映，今年初開始已進入橫行消化階段，股市裏面可以炒作的故事愈來愈少，一帶一路有點虛無，兩會加埋柴靜紀錄片，上星期刺激環保及節能減排概念獨領風騷，睇落仲未大炒的，就只有電子商貿及手遊等虛擬系股份。

主打遊戲受歡迎

手遊股IGG（08002）十年唔發市，發市當三年，上周五突然井噴式爆升，收3.56元，升19.4%，似乎股價由上市後高位10.8元，級級落跌足一年，之前仲要穿一穿2.8元招股價，去到最低2.6元，開始吸引到撈底客捧場。同屬手遊三寶的博雅（00434）同雲遊（00484），當日都見急升。

主打手機遊戲開發的IGG，單係去年首三季，盈利已經比一三年全年多幾倍，收入亦上升64%。誇張的增幅，主要是上市前盈利基數較低，兩個主打遊戲《城堡爭霸》及《領主之戰II》，前者在第三季開始，佔整體收入首次低於八成，從樂觀的角度去睇，IGG減低了對單一熱門遊戲的收入依賴。

當然，手遊股的最大風險，是一旦主打遊戲受歡迎程度下滑，而又未有其他新遊戲替補接力的話，會影響收入增長動力，尚幸《領主之戰II》在Google Play平台上的受歡迎程度唔錯，在多國保持首十熱門位置，去年開發的《Clash of Gangs》與《Gods Rush》兩款新遊戲，亦開始逐步惟玩家所認識，排名在六個國家平台的十名以內，暫時睇業績真空期應該唔會出現。

遊戲能否為玩家受落，無一定保證，基於這個考慮，美國以及新加坡的遊戲開發商，一般估值唔會太高，平均是10至12倍，本地投資者或者因為較少接觸手遊股，結果造成手遊三寶去年初的癲價，IGG高峰期去到一四年預期市盈率28倍，不過，此一時彼一時，現價一五年估值大約7.2倍，又實在低得過分，看來股市輕視了中國智能手機大冧價，推動滲透率上升，對手遊發展的好處。