Fundman睇市：長汽可睇位上車

國務院總理李克強宣讀政府工作報告，今年經濟增長目標下調到7%左右，創下九九年以來最低，難怪近三個月以來減息、降準、逆回購，擺出一幅亂石投林，乜招都出齊的姿態，但其實唔少大行策略師對於今年中國GDP估得比官方數字仲低，平均係講緊6.8%，睇怕中央全面放水救經濟，首要係救市場信心，暫時唔想發布太負面訊息，先定個中性些少增長目標，年中達唔到標，學似舊年向下修訂果一招都未定。

新能源股炒風勁

周初藉內地記者柴靜製作有關環境污染的紀錄片而炒過一浸的環保及再生能源股，尋日又再開波，漢能（00566）又升14%或者0.9元，收7.3元，同上星期五收市價4.52元比較，四個交易日升咗61%，市值再發育，升到去3,041億元，仲大過中電（00002）逾千億，認真誇張。

睇番佢一四年中期只賺17.3億元，當佢全年賺35億元（連中電112億元的三分一都唔到），都講緊76倍PE，除咗話逐浪者畀心口個勇字遮住隻眼之外，都搵唔到其他理由解釋點解咁升法。

尋日漢能的炒風更擴散到其他太陽能股身上，君陽（00397）狂升70%，陽光能源（00757）升24.5%，卡姆丹克（00712）升9.4%，聯合光伏（00686）升6.8%，連成日見拉牛上樹的保利協鑫（03800）都升3.8%，不過奉勸有份參與的散戶一句，新能源股唔少對沖基金經理鍾意當佢ATM咁，往往炒一陣跑夠數就散，看官們謹記音樂椅遊戲一完，要識得落車。

銷售表現惹憧憬

中央工作報告話今年要做好節能減排、減低二氧化碳排放、推廣新能源汽車、加快老舊車輛淘汰，簡直就係同推廣比亞迪（01211）一樣。尋日比亞迪A股（002594.SZ）升停板，H股亦都爆升高收37.35元，升6.1%，股價較月初累積升近10蚊。

講開車股，近月中國自主品牌車市佔率升番，長汽（02333）的火鳳凰故事應該最吸引芬佬眼球。唔覺唔覺，股價由舊年十月的30元水平起步，輾轉都升番五成六。

長汽啱啱出咗二月銷售數字，在春節淡市下，賣出5.18萬輛，按年升3.4%，累積首兩個月則賣13.9萬輛，比舊年同期升16.8%。新款SUV哈弗H6繼續賣得唔錯，兩個月賣出5.6萬輛，升31%，佔總銷售數字四成。開賣不久的高檔SUV H9，亦開始漸入狀態（摩通年初估佢可以去到每月1萬輛的銷售水平），而今年較後時間，仲有H8及混燃H7新款推出，食住油價回落SUV銷情熱爆呢個勢，今年的銷售增長是值得期待。

話時話，最快下半年推出的混燃H7，同分析員放風售價會係16至18萬人仔，同比亞迪「唐」傳聞中60萬人仔的入門價相比低一截，如果要搵節能減排概念，又唔想畀太高溢價，其實不妨諗諗長汽，至少佢一五年PE得10.5倍，以今明兩年35%及18%的預期盈利增長率計，現價唔貴，有貨繼續持有，無貨可以等45元左右上車。