股海實戰：北車具增長潛力

事實上，自從周六人行宣布減息後，港股除周一先高後低錄得輕微升幅外，其後三個交易日持續向下，證明減息已失去點石成金作用，投資者現階段對內地經濟前景似乎更為擔憂。以技術走勢來睇，恒指跌穿咗50日線，走勢明顯轉淡，短期有機會進一步下試100日線23,901點。

環保股鑊氣十足

尋日主板一共有842隻股票下跌，升的只有451隻，但市場不乏炒作焦點，其中環保概念股持續有追捧，個別細價股亦開始落鑊，市場氣氛實際唔太差。

近日市場焦點自然係隻漢能薄膜發電（00566），股價連日大幅飆升之餘，尋日升至9.07元高位，市值一度超越長實（00001），更榮登最大成交金額首位，認真誇張。但由於股價已經累積龐大升幅，短期料會趨波動，非常難炒，所以阿莊覺得一般投資者都係食花生當睇戲好過。

阿莊早前買入短炒的南京熊貓電子（00553），尋日升抵目標價7元，阿莊亦順利以7元沽貨食胡，持貨唔夠一星期，有接近一成利潤，都算唔錯。

內地今年GDP增長預測目標約7%，為二○○四年以來最低，A股昨日持續偏軟，滬綜指低開後一度低見3,221點，最後雖然反彈上3,248點收市，但全日仍跌31點。內地鐵路基建股活躍，而在港上市的中國南車（01766）及中國北車（06199）亦表現突出，股價分別升4.74%及5.04%，收報9.72元及10.42元。

總理李克強表示，今年鐵路投資保持8,000億人民幣以上，這對南北車來說確實是好消息。事實上，內地經濟增長持續放緩，房地產市道遲遲未有起色，在經濟缺乏新動力之下，加大基建投資無疑是拉動經濟增長的唯一方法，因此在此大前提下，相信中央不會貿然放慢基建投資，對南北車股價起支持作用。

阿莊觀察北車有一段時間，股價早前跌穿10元後見有不俗承接，預期在中央加大基建投資及「一帶一路」概念之下，股價長炒長有，建議待股價回落至10元或以下水平買入，目標11.3元。