SUN MONEY：金融界驕子 置業論得失

AMTD證券業務部總經理鄧聲興（Kenny）貴為金融專家，卻曾在樓場上歷「情傷」，在○八年金融海嘯後過早沽出位於東半山自住盤，令他錯失樓市升浪，更一度被逼租同區樓捱貴租。

大學主修金融的Kenny在學時已深明買樓投資的道理，他九六年踏入金融界，僅拚搏四年，便成功購得上車盤，他笑言：「我嗰陣上樓容易過依家好多！嗰陣我大學畢業，人工係萬幾蚊，到廿年後嘅今日，大學畢業生仲係萬幾蚊人工！再者，以前上車盤係講緊200萬樓下約五百呎嘅樓，加上有八成按揭，隨時儲40萬已經上到樓啦，邊似依家郁啲要過百萬首期吖？」當時他在家人幫助下，以約200萬元買入北角繼園街約500呎單位自住。

股場上投資者追求「低買高沽」，惟Kenny坦言房地產成交時間較長，難以如投資股票般「追揸沽」，容易錯失入市機會，○八年時他就錯手過早沽出其東半山的樓盤，使其直至目前仍會大呼「揼心」。

誤判嘯後樓市走勢

事緣他○五年以三百餘萬買入該單位，持貨三年，以約五百萬元沽出，僅賺逾兩成，惟單位目前市值已逾千萬元，與大升浪緣慳一面。他又指：「金融海嘯咁恐怖，當時我預股樓市場會衰一年半載嘛，咪沽出單位穩袋兩成回報先，點知美國半年後就量寬，○九年樓市彈番起，買樓又唔似買股咁可以好決斷，樓市升咗一大截先回魂，搞到我捱咗兩、三年貴過供樓嘅租，去租番同區樓。」

近年細價樓癲升，Kenny當年的上車盤升幅亦同樣架勢！同類單位若由○○年持貨至今，賺幅動輒可逾兩倍。一二年他搬到現時居住的荃錦公路低密度屋苑，持貨至今近三年，帳面僅升逾一成，惟他卻悠然自得說：「冇計啦，又唔係揸細價樓，自住都無謂太注重樓價上落啦！」

鄧聲興置業最慘痛經歷

2008年沽出名下東半山樓盤，錯失樓市升浪，目前單位市值過千萬。