短炒倉：超威現價估值吸引
內地通脹超標，人行昨日隨即出手，年內第四次調高存款準備金率，可以預期，但凡一切同個「價」字有關嘅項目，不論樓價、油價、物價等，未來一段日子都會受到嚴密監控，亦為相關股份帶來額外嘅政策風險。相反，一些跟隨國策步伐嘅股份，例如環保、節能、新能源等，就唔會有呢樣煩惱，可以放心捧場。
利好消息支持股價
生產電動自行車用的鉛酸動力電池的超威動力（00951），股價自上月中低見2.55元後持續回升，上周五再升4.5%，以3.2元報收。
集團早前公布截至去年底止全年純利2.68億元人民幣，按年增長32.83%，每股盈利31分人民幣（約0.36港元）。另外，集團亦宣布於江西省上高縣投資興建電極板生產線。有利好消息支持，難怪股價愈升愈有。
志強二月時亦曾介紹過超威，當時目標3元，現已超標完成，但以現價計，超威市盈率亦只不過係8.8倍，較同業天能動力（00819）嘅十一倍低一截，若然估值睇齊，超威股價可見4元，止蝕3元。
