吳若希（左起）、鄭俊弘、許文軒、黃煦齡、許廷鏗及胡鴻鈞一同親親小羊，玩個不亦樂乎！
緋聞女王吳若希孖「男友」鄭俊弘到西貢郊外拍拖做牧羊人，一嘗親親大自然的滋味！去年負面新聞一籮籮的她直言被是非嚇怕，希望大家減少關注她，並謝絕所有緋聞！
謝絕緋聞的吳若希提議公司所有男歌手輪住見她，認真大想頭！
緋聞多多的吳若希（Jinny）日前與緋聞男友鄭俊弘（Fred）、許廷鏗、胡鴻鈞（Hubert）及兩位無綫娛樂主播許文軒及黃煦齡，到西貢白水碗拍攝賀年節目。眾人寓工作於娛樂，在羊年扮牧羊人，與小動物來個近距離接觸，Jinny與Fred合照時更「糖黐豆」企埋一齊，Sweet到爆！
一姐食檸檬
談到大部分藝人希望廣大市民認識自己，去年是非纏身的Jinny表示雖然多了人關注自己，卻希望今年可減少新聞：「少啲新聞，等大家關心我嘅工作同睇到我係有付出努力！」問到可會想尋找真命天子謝絕所有緋聞，Jinny笑言有方法減少緋聞：「叫我公司所有男歌手輪住日日見。」Hubert聽罷即反擊：「我知你係公司一姐，但有冇理過我哋感受？」
Fred自言好運
談到與Fred的緋聞時，Jinny大讚他處理得很好，更要向他學習。她透露兩人傳緋聞後變得更老友：「其實Hubert都好好，我早排唔開心，佢係我夜晚傾心事嘅好對象。」Hubert則指其新年願望很簡單，就是開開心心，最重要是好友Jinny負聞愈來愈少。而許廷鏗想專心做音樂人，雖然去年未有推出專輯，歌曲仍獲得不俗成績，故今年會用心做好歌手本分。至於Fred突然感觸地說：「我好好運，希望可以Keep住，同埋希望有多啲自己參與創作嘅部分如作曲。」
音樂組
