發哥愛老婆會發達！

肖羊的影帝周潤發今年將踏入60歲，依然身形Fit爆、精力充沛，堪稱「逆齡男神」！日前發哥在四川成都接受《東網》記者專訪，他祝願全港市民開心快樂，並希望樓價降低人人有屋住，以及社會氣氛更和諧！

旺足40年的發哥長期企穩一線男星寶座，今年主演的賀歲片《賭城風雲Ⅱ》更大收旺場，上映四日內地暫時收逾2億4千萬元人民幣（約2億9千8百萬港元），香港截至前日則有1,152萬港元票房，發哥昨日回應：「我同晶哥（導演王晶）通過電話，佢最開心啦！我都開心，舊年4日都未過億，今年快咗好多，一開畫就6千幾萬啦！多咗成倍！（破舊年5億幾嘅紀錄？）睇形勢應該會，晶哥又唔係好貪，想收8億，希望係啦！」

冇發嫂督促唔沖涼

發哥分享長旺秘訣，首先最緊要是「愛老婆會發達」，並以風趣的方式表達與發嫂之間的深情：「冇佢喺我身邊就死得喇！咩都唔想做喇！我仲係BB嚟，唔帶佢出嚟邊個照顧我？我衫又唔買，妝又唔化，污污糟糟咁，有人指住我令我檢點啲好啲嘅！如果唔係我幾日都唔沖涼，冤崩爛臭，正一臭男人嚟o架喇！（鍾意發嫂啲咩？）簡單、好純又聰明勤力，佢鍾意鑽研好味菜式，有啲味道係佢先煮到！」

生日禮物送魚蛋河

發哥自爆兩人仍不忘慶祝生日及結婚周年，笑言會送花及魚蛋河：「生日就送多兩粒魚蛋同片頭，有圓有三角好過癮！哈哈！（點慶祝下年結婚30周年？）整兩粒湯圓佢歎囉！」

此外，發哥認為成功在於生活簡單少負擔，不追求名利及新科技，另外就是不斷求進，即使貴為影帝仍謙虛學新事物：「想進步就唔好自滿，事實上自己有好多嘢唔識，就算睇劇本都會遇到唔識嘅中文字，讀書讀得少吖嘛！唔識就要問人！」

羊年願望做山寨王

提到羊年願望，熱愛行山的發哥笑言想盡快行畢全港所有行山徑，並認同60歲是人生新階段：「六十古來稀吖嘛！哈哈！60歲係值得懷念嘅年份，最想快啲拎到長者兩蚊優惠，我成日坐公共汽車，方便好多o架！」問到近年新春有何節目，發哥表示多數留家等好友前來拜年，並會睇書、上網、整理相片及行山：「好少出埠，唔想舟車勞頓，留港就多數行山囉！冇人過年行山嘛！全個山頭都係我，做咗山寨王！（布置屋企？）買盆花囉！桔都好少買，食嘢都係簡單，最緊要食菜食魚，賀年食品好似油角、煎堆就食少少啦！」發哥又透露羊年繼續拍戲，包括接拍導演陳木勝新作，發迷記得留意！

嘉玲紅姑也「捕獲」

另外，近日掀起「捕獲發哥」熱潮，連兩大女神劉嘉玲及鍾楚紅都加入行動！兩大美人不約而同於昨日上傳與發哥大玩Selfie的靚相，原來三人前晚世紀飯敍！向來與發哥老友鬼鬼又曾合作電影《縱橫四海》的紅姑上傳自拍時留言：「好久不見！」相中兩人親密依偎，足見友情深厚！不久後嘉玲亦公開捕獲發哥的相片並留言：「好消息！飲番杯！」嘉玲不僅上傳搞怪自拍，更外加一張與發哥碰杯照片，相信是賀主演電影《賭城風雲Ⅱ》票房報捷！