錢國偉夜店出招拖馬瑙黐DaDa

導演錢國偉前晚拉隊到蘭桂坊夜蒲，對眾女照顧周到，先與陳靜（DaDa）倚欄談心，再拖實混血索模馬瑙，親自護送她離開。

最近殺入影壇做電影導演的錢國偉，正為新片《喜愛夜蒲》做準備，前晚他率領演員DaDa、陳柏宇、楊愛瑾（Miki）、連詩雅、「萬寧哥哥」沈志明、模特兒許穎（Phoebe）與馬瑙到蘭桂坊「考察」。不過場內所見，眾人多留在座位傾偈，未有到舞池狂歡，最多只是猜枚飲酒，期間錢國偉逐一與演員密斟，並拉着DaDa倚着扶手把酒傾談，介紹夜場風光。至於混血兒馬瑙則全程「自然High」，隨着音樂在錢國偉身旁喪扭，當她離開時，被冧暈的錢國偉即拖實她護駕。

錢國偉表示特地帶新片演員視察環境，因部分演員沒有夜蒲經驗，問到會否將親身經歷融入電影，他說：「唔多唔少都有，其實套戲好似以前部《晚9朝5》，但唔係三級，希望靠特別感覺，唔係賣肉。」

陳柏宇尷尬溝女

而陳柏宇抵達時一臉尷尬，更拒絕透露為何現身蘭桂坊，只說：「我係嚟溝女嘅！（有拍拖？）有就唔使嚟啦！溝到又唔使再返嚟啦！（試過被溝？）邊個唔想，但冇囉！」Miki則透露在片中要色誘「萬寧哥哥」，故對鏡練習誘惑感覺：「希望做到有矜持又唔Cheap！（性感？）應該唔輪到我，戲入面要同人爭仔，現實中未做過第三者，反而畀人隱瞞。」首次拍戲的連詩雅則表示勁緊張，並自嘲身形欠佳，故不會Sell性感。